✨Хүндүлүг номчукчулар! — 6 июня 2026 г. в 10:09:06.339
✨Хүндүлүг номчукчулар! Александр Сергеевич Пушкинниң төрүттүнген хүнү болгаш орус дыл хүнү-биле! Июнь 6 – өндүр ыдык, ат сураглыг, амгы орус литературлуг дылдың болгаш чечен чогаалдың үндезилекчизи, улуг чогаалчы Александр Сергеевич Пушкинниң төрүттүнген хүнү. Бо онзагай хүннү Россияда орус дыл хүнү кылдыр 2011 ч. байырлап эрттирип турар. Ынчангаш июнь 6-да чурттуң бүгү-ле булуңнарында сураглыг улуг чогаалчының чогаалдарын кадагалап, нептередир сорулгалыг янзы-бүрү солун хемчеглерни бедик деңнелдиг эрттирип турары чаңчылчаан. ⚡️Чылдар эртсе-даа, А. С. Пушкинниң алдар-ады, чогаалдары кезээде өлүм чок артар. Силерге чогаалчының тыва дылче очулдурган чамдык шүлүктерин бараалгаттывыс. Арат хөйнүң эрткен изи бүдүп читпес, Александрий баганадан бедик баштыг, Анаа кижи холу-биле кылып калбаан, Алдарлыг тураскаалым тургускан мен. Амы-бодум, эът бодум өлзүмзе-даа, Алдар-адым күзелдиг чогаалымда, Айның адаа чырык черниң кырынга Артып калган чогаалчыга уттунмас мен. Улуг Руська адым-сураам хадып үнер, Улус-ла болганга, славяннар оглунга, Амгы черлик диртир, сын чурттуг тунгуска, Ак хову чурттуг калмыкка ададыр мен. Уяранчыг чогаалымга кээргел ырлааш, Үерленген кадыг өйде хостал чарлааш, Улус-чонга кезээ шагда уттундурбас, Улуг аттыг, чаагай аттыг дидиртир мен. (очул. С. Пюрбю) *** Чуртталганың муңгак делгем ховузунда Чажыртынган үш суг бажы үнүп чыдар: Шулурткайнып, хайнып, чайнап, дүрген аккан Чалыы өйнүң дүвүренчиг дамыраа бар. Шөлүттүрген кижилерни хей-аът киирер, Шүлүкчүлер суксуну боор кара-суг бар. Сөөлгү булак – уттуушкуннуң соок суу-биле Чүректерниң халыын одун намдадыптар. (очул. Э. Мижит) *** Өлүмү чок чечен сөстүң чаяакчызы Өөрүшкүнүң, хосталганың ыраажызы Чонувустуң ынаа сиңген чоргааралы Чогаалчывыс улуг Пушкин бистиң-биле Улустарның угаан, чүрээн оттурупкан Узуп төтпес эртинени арттырып каан, Чүден мерген шүлүкчүвүс Пушкинни Чүс-чүс чылда кижи-төре алгап йөрээр! (очул. С. Молдурга)