⭐ Шоюн Александр Сан-ооловичиниң 70 харлаанынга — 4 августа 2026 г. в 04:45:52.801
⭐ Шоюн Александр Сан-ооловичиниң 70 харлаанынга Александр Сан-оолович Шоюн – артист, журналист, уруглар чогаалчызы, редактор, Россияның Журналистер, Чогаалчылар, Театр ажылдакчыларының эвилелдериниң кежигүнү, «Россия Федерациязының алдарлыг журнализи», «Тыва Республиканың культуразының алдарлыг ажылдакчызы», «Тыва Республиканың культуразының болгаш уран чүүлүнүң Хүндүлүг хоочуну» деп хүндүлүг аттарның, «Тыва Республиканың Күш-ажылчы шылгарал дээш» деп медальдың, Тыва Республиканың культура база кино яамызының чогаал база уран чүүл талазы-биле шаңналының лауреады, «Правда» база «Шын» солуннарының 100 харлаан Юбилейлиг хөрек демдектериниң, хөй санныг шаңнал-макталдарның болгаш Хүндүлел бижиктерниң эдилекчизи, «Тес-Хем кожууннуң Хүндүлүг хамаатызы». Ол 1956 ч. август 4-те Тес-Хем кожууннуң Берт-Даг суурунга тѳрүттүнген. Школачы чылдарында-ла уран чүүлге сонуургалдыг турган. Школа соонда, Москваның Б. В. Щукин аттыг театр институдунче ѳѳренип киргеш, ону 1978 ч. чедиишкинниг дооскан. Күш-ажылчы намдарын Тываның В. Кѳк-оол аттыг хѳгжүм-шии театрының артизи бооп ажылдап эгелээн. Школачы, студент чылдарында-ла «Тываның аныяктары», «Шын» солуннар-биле сырый харылзаалыг, ооң арыннарынга шүлүктери, бижээн материалдары үнүп турганындан, 1983 ч. журналистикаже шилчип, «Тываның аныяктары» солунга корреспондентилеп, кол редакторнуң оралакчызынга чедир ажылдап турган. 1990 ч. катап тургустунган республиканың «Сылдысчыгаш» уруглар солунунуң кол редакторунга соңгуткаш, саң-хѳѳ айтырыы чеже-даа бергедежип турган болза, солуннуң үндүрүлгезин ара соксатпайн, кызымаккай тура-соруктуун кѳргүзүп, сагынгыр-тывынгыры-биле 30 чыл дургузунда үзүктел чок редакторлап келген. «Сылдысчыгаш» солуну уругларның ёзулуг ѳңнүү, сүмелекчизи, чогаадыкчы хей-аът киирикчизи болбушаан, ажыктыг, ѳѳредиглиг, кижизидикчи чүүлдерни шиңгээдип алырынга, оларны амыдыралдың бот-тускайлаң оруунче кииреринге үлүг-хуузун кадып, чогаалга сонуургалдыг ѳзүп орар салым-чаяанныг уругларны илередип, деткип турар буянныг солун. 2011 ч. эгелеп, Александр Шоюннуң удуртулгазы-биле уругларга «Алдын-Кушкаш», школа назыны четпээн уругларга «Салгынчыгаш» деп сеткүүлдер үнүп турар. «Сылдысчыгаш» база «Алдын-Кушкаш», «Салгынчыгаш» сеткүүлдер республика, Бүгү Россия чергелиг аңгы-аңгы чогаадыкчы мөөрейлерге, делгелгелерге, уран номчулга фестивальдарынга киришкеш, шаңналдыг черлерни удаа-дараа ээлеп келген. Александр Сан-оолович чогаал ажылын 1975 ч. эгелээн. Ооң чогаалдарының кол угланыышкыны уруглар темазы, оларның назы-харынга таарыштыр бижиттинген он сес номну чырыкче үндүрген: «Балыктар аштай бээр» (1987), «Календарь» (1997), «Инчееэмде олчаларым» (2011), «Кандаай чоор?» (2003), «Күжүгенниң ужуралдары» (2009), «Чылдың үелери» (2003) болгаш өске-даа өөредиглиг, кижизидикчи уткалыг, ажыктыг, солун чүүлдерни билип алырынче угааткан номнарның автору. Долузу-биле ВК арынывыста