А. С. Пушкин аттыг Национал ном саңының чурт-шинчилел чогаалы болгаш национал библиогра...
А. С. Пушкин аттыг Национал ном саңының чурт-шинчилел чогаалы болгаш национал библиография килдизинге, октябрь 14-түң хүнүнде, Республиканың хөй-ниити кадык-камгалалының болгаш эмчи профилактиказының төвүнүң эргелекчизи Анастасия Хомушку, эмнелгениң хүреш тренери Арзылаң Түлүш, фельдшер Чодураа Кунгаа, арыг-силиг кижизидилгезиниң эмчизи Азиана Тарма, психолог эмчи Чойганмаа Допай Кызылдың башкы колледжизиниң сургуулдарынга «Кадыкшыл сээң холуңда» деп ажыктыг, солун ужуражылганы эрттиргеннер. Эмчилер кижи бодунуң кадыынче сагыщ салып тургаш, назынын узадып ап болурун, шын чемненирин, кижиге шимчээшкинниң кайы-хире ажыктыг болурун чижектерге айтып, чугаалап берген. Психолог Чойганмаа Допай оюн дузазы-биле кижи бодунуң база чанында кижиниң кадыын канчаар камгалап ап болурунуң аргалары барыл дээрзин сургуулдарны боттарын киириштирип тургаш, көргүскени онзагай. Солун, ажыктыг ужуражылга дээш, чурт-шинчилел килдизиниң ажылдакчыларынга, эмчилерге Кызылдың башкы колледжизиниң эге класс башкыларының 1-ги курузунуң сургуулдары өөрүп четтиргенин илереткеннер.