⭐️🕊ГЕОРГИЕВСКАЙ ЛЕНТА ХАЙДАХ ҮӨСКЭЭБИТЭЙ? — 6 мая 2026 г. в 10:08:20.158
⭐️🕊ГЕОРГИЕВСКАЙ ЛЕНТА ХАЙДАХ ҮӨСКЭЭБИТЭЙ? 🇷🇺Билиҥҥи кэмҥэ дьон-аймах георгиевскай лентаны Улуу Кыайыы күнүн кытта сибээстииллэр. Оттон эһиги бу лентабыт хайдах үөскээбитин билэҕит дуо? ⭐️Георгиевскай лентаны 1769 сыллаахха сэтинньи 26 күнүгэр Екатерина II олохтообут. Бу Сибэтиэй Георгий аатынан Российскай империя үрдүкү наҕараадата этэ. Маҥнай олохтонуута бу анал бэлиэ сэрии кэмигэр, хорсун дьону көҕүлээн, бэйэлэрин үчүгэйдик көрдөрбүт дьоҥҥо бэриллэрэ. Бэриллибитин кэннэ олоҕун тухары харчынан бириэмийэлэнэрэ уонна көлүөнэттэн көлүөнэҕэ бэриллэн иһэрэ. Оттон 1807 сылтан үрдүк дуоһунастаах эрэ дьоҥҥо буолбакка, байыаннайдарга, кыра дуоһунастаах дьоҥҥо да эмиэ бэриллэр буолбута. 🕊Кэлин Георгиевскай лента үгэһэ армияҕа сылдьар дьоҥҥо тарҕаммыт. Улуу Сэрии кэмигэр хара уонна оранжевай (эбэтэр араҕас) өҥнөр «Германияны кыайыы иһин!» орденыгар уонна мэдээлигэр туттуллубуттара. 2005 сылтан дойдубут үрдүнэн «Георгиевская ленточка» диэн акция саҕаламмыта. Бу акцияҕа лентаны кыра оҕоттон саҕалаан кырдьаҕаһыгар тиийэ түөспүтүгэр иилинэн, Улуу сэриигэ кыттыбыт бэтэрээннэрбитигэр убаастабылбытын уонна махталбытын көрдөрөбүт. 🕊Маннык акция биһиги оскуолабытыгар сылын аайы ыытыллар үтүө үгэскэ кубулуйда. Кыайыы күнүн көрсө хас биирдии кылаас оҕото нэдиэлэ устата лентаны иилинэн үөрэнэбит, харыстабыллаахтык сыһыаннаһабыт. Маны таһынан оҕолор нэһилиэкпит саастаах дьонугар, тыыл бэтэрээннэригэр, сэрии кэмин оҕолоругар уонна көннөрү биир дойдулаахтарбытыгар да ленталары уонна сөпкө кэтии быраабылатын тарҕатабыт. Онон, хас биирдии оҕо бэтэрээннэри өйдүүр, убаастыыр буолан, бу акцияҕа көхтөөх кыттыыны ыла сылдьабыт диэн этиэхпин баҕарабын. 📝Олеся Неустроева, 10 кылаас “Дьоҕур” медиакиин, Кэбээйи орто оскуолата