Үөһээ Бүлүү улууһун үөрэҕин салалтатын, педагогическай общественноһын уонна тус бэйэм а... — 21 июня 2026 г. в 07:22:19.408
Үөһээ Бүлүү улууһун үөрэҕин салалтатын, педагогическай общественноһын уонна тус бэйэм ааппыттан, улууспут ытык мааны олохтоохторун, күндү ыалдьыттарын Сахабыт сиригэр Үрүҥ Тунах ыһыахтар саҕаланар үөрүүлээх күнүнэн истиҥник эҕэрдэлиибин! Бэс ыйын 21 күнэ — саха дьоно кыһыны этэҥҥэ туораан, айылҕалыын алтыһар, самаан сайыны көрсөр, айыыларга сүгүрүйэр, уйгуну-быйаҥы түстүүр бэлиэ күннэрэ. Үрүҥ Тунах ыһыах – барыбытын түмэр, сомоҕолуур ытык тэрээһиммит. Ааспыт сыллар улаҕаларыгар өбүгэлэрбит түстээбит үгэстэрин ытыгылаан, Алгыс этэн үрүҥ илгэни, өҥ-быйаҥ сайыны, эйэни, этэҥҥэ буолууну уонна чэлгийэ сайдыыны көрдөһөбүт. Быйылгы үрүҥ Тунах ыһыахтар дойдуга биллэриллибит норуоттар сомоҕолоһууларын, Өрөспүүбүлүкэҕэ культура, улууска үөрэхтээһин 150 сылыгар ананан ыытыллаллар. Бүгүҥҥү улууспут эдэр ыччата Өрөспүүбүлүкэ Ил Дархана Айсен Николаев, улууспут Баһылыга Валерий Николаев тула түмсэн, Саха Сирин, улууспут инники сайдыытын түстүүллэр. Бу кэрэ - бэлиэ күҥҥэ Анал байыаннай дьайыыга Аҕа дойдуларын көмүскүү сылдьар байыастарбытыгар Үрүҥ Тунах Ыһыаҕынан истиҥ эҕэрдэбин тиэрдэбин! Ыһыахтарга түһэр Айыылар Алгыстаах этиилэрэ хорсун санаалаах байыастарбытыгар чөл, доруобай туругу, харысхаллаах буолууну, дойдубутугар кэтэһиилээх Кыайыыны аҕаллын! Саамал ыһыах алгыһа Эһигини арчылыы, араҥаччылыы сырыттын, кэлэр кэнчээри ыччаппыт кэскиллэрэ кэтирээтин, эдэр ыччат дьоммут төрүүр оҕолоро төлкөлөннүн, иитэр сүөһүлэрэ күрүөлэннин, дьол соргу тосхойдун, уйгу быйаҥ олохсуйдун! Айыыһыппыт Алгыһа хас биирдии дьиэҕэ тиийдин, Аҕа дойдубутун көмүскүүр буойуннарбытыгар модун күүстээх санааны, кэхтибэт кэскили түстээтин, быйылгы сайыммыт быйаҥнаах, өлгөм үүнүүлээх буоллун! Барыгытыгар чэгиэн-чэбдик туругу, үлэҕэ, үөрэххэ ситиһиилэри, дьолу - соргуну баҕарабын! Үөһээ Бүлүү улууһун үөрэҕин салалтатын начальнига, Ю.В. Кынатов