Бэс ыйын 18 күнүгэр «Үс Хоһуун» спортивнай комплекс манеһыгар оҕолорго уһуну сүүрүүгэ ... — 19 июня 2026 г. в 00:43:09.511
Бэс ыйын 18 күнүгэр «Үс Хоһуун» спортивнай комплекс манеһыгар оҕолорго уһуну сүүрүүгэ Саха сирин 15 төгүллээх кыайыылааҕа, элбэх төгүллээх рекордсмена, сахалартан бастакынан Советскай Союз спордун маастарыгар кандидат, Саха АССР спордун маастара, РФ спордун ветерана, Саха АССР физкультураҕа уонна спортка туйгуна, ХХ үйэ спортка лауреата, Үөһээ Бүлүү улууһун уонна Дүллүкү нэһилиэгин Бочуоттаах олохтооҕо Андрей Иванович Устинов сырдык кэриэһигэр үһүс төгүлүн тэриллибит республикатааҕы сүүрүү күрэҕин өрөгөйдөөхтүк түмүктээһин ыытылынна. Бэлиэтээн эттэххэ, бу биирдиилээн бастыыр иһин республикатааҕы турнирга икки сааһынан категорияҕа: 2011-2012 с.т. 16-гар диэри саастаах уонна 2013-2014 с.т. 14-гэр диэри саастаах спортсмен оҕолор кыттыыны ыллылар. Араас дистанцияларга: 100, 300, 400, 800, 1500, 3000 м сүүрүүлэр буоллулар. Маны таһынан, устаны ойууга куоталаһыы уонна улуустарынан эстафета ыытылынна. Түмүккэ сүрдээх элбэх мэтээл комплега оонньонон, миэстэлэр быһаарылыннылар. Ол курдук, саамай элбэх мэтээллээх Дьокуускай куорат оҕолоро 1-кы, Мииринэй хамаандата 2-с, оттон Горнай хамаандата официальнайа суох медальнай зачетунан 3-с миэстэ хаһаайыттарынан буолан, тоҥмут-хаппыт, сүүрбүт-көппүт эрэйдэрэ тилиннэ. Нам улууһуттан кэлбит 3 кыттааччы оҕолор бары миэстэҕэ тиксэн, үөрүү үлүскэнин биллилэр. Кинилэр кэннилэриттэн Бүлүү уонна Өймөкөөн улуустара аҕыйах кыттааччылаах кэлбиттэр. Итини сэргэ тэрийээччилэр барыта 16 номинация олохтообуттарыттан иккилии номинацияны саамай элбэх кыттааччылаах Мииринэй, Үөһээ Бүлүү, Горнай, Бүлүү улуустара уонна Дьокуускай куорат ыллылар. Кыра ахсааннаах кыттааччылаах Өймөкөөн уонна Нам улуустара биирдии номинацияҕа тигистилэр. Ону таһынан, туспа номинацияны Үөһээ Бүлүүттэн икки саамай кыра саастаах уол уонна кыыс ыллылар. Үөһээ Бүлүү улууһуттан спортсменка Константинова Мари кыраларга икки кылгас дистанцияларга икки төгүл бастаан, ураты чаҕылхай ситиһиини аҕалла! Бэлиэтээн эттэххэ, күрэхтэһии биир кэрэхсэбиллээх түгэнинэн кыайыылаахтар ортолоругар сэрэбиэй быһыытынан iPhone 17 уонна Sony Playstation 5 игровой приставка оонньоммута буоллла. Дьэ, бу сыаналаах бириистэр хайа дьоллоох оҕоҕо тигистилэр? Ытык киһибит Андрей Иванович Устинов оҕолоро туруорбут бириистэрин -- 70000 суумалаах iPhone-17 телефону кыргыттарга Горнай улууһуттан бастакы миэстэ хаһаайката Виктория Заровняева, оттон уолаттарга Sony Playstation-5 игровой приставканы Мииринэй куораттан Артур Павлов тардан ылан, атахтара сири билбэт буола үөрдүлэр! Андрей Устинов аатынан республикатааҕы турнир сүрүн спонсордарынан кини оҕолоро буолаллар. Маны сэргэ Үөһээ Бүлүү бэтэрээн сүүрүктэрэ, Дүллүкү нэһилиэгин дьаһалтата (баһылык Николай Петрович Романов), Үөһээ Бүлүү улууһун дьаһалтата, улуустааҕы спорт управлениета, Мииринэй куораттан сүүрүктэр сообществолара, Мииринэй куоракка олорор Дүллүкү нэһилиэгин үлэһит ыччаттара, АЛРОСА ХЭТ профсоюзнай тэрилтэтэ улаханнык өйөөн, күрэхтэһии отой үрдүк таһымҥа барбытын этиэххэ наада. Санаттахха, күрэххэ 6 хамаанда: Дьокуускай (тренер Аксинья Строева), Горнай, Нам (тренер Диана Тартакынова), Өймөкөөн (тренер Ульяна Винокурова), Мииринэй, Бүлүү (тренер Туйаара Рожина) уонна Үөһээ Бүлүү (тренердэр Раиса Григорьева, Инесса Окладникова, Николай Софронов) улуустарын эдэр сүүрүктэрэ кыттыыны ылаллар. Тэрийээччилэринэн Үөһээ Бүлүү оройуона, Дүллүкү нэһилиэгэ уонна Андрей Иванович оҕолоро, аймахтара буолаллар. Маннык турнир, үгэс курдук, аны икки сылынан улуу сүүрүк Андрей Иванович Устинов төрөөбүт-үөскээбит Үөһээ Бүлүүтүгэр ыытыллыаҕа. Галина Васильева #АндрейУстинов #Республикакүрэҕэ #Чэпчэкиатлетика