Усуйаана сэлиэнньэтигэр уу таһыма түстэ — 4 июня 2026 г. в 06:12:25.653
Усуйаана сэлиэнньэтигэр уу таһыма түстэ Усуйаана улууһун Усуйаана сэлиэнньэтигэр уу таһыма намтаан эрэр. Бу уонна атын нэһилиэнньэлээх пууннар гидрологическай балаһыанньаларын СӨ Гражданскай көмүскэлгэ миниистир Дмитрий Лепчиков салайыылаах ыытыллыбыт суһал штаб мунньаҕар ырыттылар. Дьааҥы өрүскэ муус алын кырыыта Усуйаана аннынан баара бэлиэтэннэ. Сарсыарда 8 чааска уу таһыма 1104 см тиийбитэ, бу кутталлаах кирбииттэн (1023 см) үрдүк көрдөрүү. Бүтэһик чаас устата 2 см түспүт. Бэҕэһээ, бэс ыйын 3 күнүгэр, Дьааҥы өрүс уҥа салаатыгар, Усуйаанаттан 15 км аллараа, муус харыытын дэлби тэптэрии үлэтэ барбыта. Быыһыыр сулууспа уонна РФ ЫБММ быыһааччылара Ми-8 бөртөлүөтү туһанан, барыта биир туонна дэлби тэптэрэр матырыйаалы туттубуттара. Нэһилиэнньэлээх пууҥҥа 66 тиэргэҥҥэ уонна 10 олорор дьиэҕэ уу киирбитэ. Дьиэлэр сиртэн биир миэтэрэ үрдүктээх сыбаайаларга тураллар. Индигиир өрүскэ Абый улууһун Киэҥ Күөл сэлиэнньэтин аттыгар уу таһыма кутталлаах кирбииттэн (1551 см) үрдээн, 1594 см тиийбит. Манна 10 тиэргэн уонна 2 олорор дьиэ ууга былдьаммыт. Халыма өрүскэ муус алын кырыыта төрдүгэр тахсыбыт. Үөһээ Халыма улууһун Зырянка бөһүөлэгэр уу таһыма кутталлаах кирбииттэн (770 см) үрдээн, 790 см тиийдэ. Сөмөлүөт түһэр былаһаакката ууга сытар. Орто Халыма улууһун Налимскай сэлиэнньэтигэр уу таһыма эмиэ үрдээн, биэс тиэргэн, оскуола уонна уһуйаан тиэргэннэрэ ууга бардылар, ол гынан баран кутталлаах кирбиини өссө ааһа илик. Халыма салаатыгар Ясачнай өрүскэ уу таһыма эмиэ үрдүк. Үөһээ Халыма улууһун Үөһээ Халыма сэлиэнньэтигэр кутталлаах кирбииттэн (1000 см) үрдээн, 1028 см тиийдэ, 18 тиэргэн ууга баран турар. Сууккаҕа уу 20–60 см түһэрэ күүтүллэр. Алдан өрүскэ халаан иккис долгунун кэнниттэн балаһыанньа оннугар түстэ. Уус Майа уонна Томпо улуустарын кытылынан сытар сэлиэнньэлэрэ ууттан босхолоннулар. Ол эрээри Учуртан кэлэр ардах уутун долгунун сабыдыалынан, Чагда сэлиэнньэтин аттыгар чугастааҕы сууккаҕа уу таһыма үрдүүрэ сабаҕаланар. Хаартыска: sakha.gov.ru