Тааттаҕа тырахтарыыстар күрэхтэрэ ыытылынна — 26 июня 2026 г. в 03:32:10.898
Тааттаҕа тырахтарыыстар күрэхтэрэ ыытылынна Таатта улууһун Дьүлэй нэһилиэгэр удьуор механизатордары ааттаан, үлэһит киһини өрө тутар соруктаах тырахтарыыстар күрэхтэрэ сүрэхтэннэ. Манна Дьүлэй нэһилиэгин 11 олохтооҕо кытынна, саамай аҕа саастаахтара, 1967 сылтан тыраахтартан түспэт 78 саастаах Терентий Егоров буолар. Бастакытын ыытыллар күрэх 4 түһүмэҕинэн барда. Тырахтарыыстар бастакы түһүмэххэ тимир көлөлөрүн муоһунан биир-биир чууккалары иилэн ылан, үрүт -үрдүгэр уурталаатылар. Иккискэ эмиэ муоһунан буруус маһы көтөхтөрөн аҕалан, икки маска лып гына ууран кэбистилэр. Бу барыта бириэмэҕэ буоларынан, ыгылыйан, долгуйа, сыыһа-халты туттуу таҕыста. Ол эрэн, уолаттар бу модьу техиникэлэри талбыттарынан муоһалаан, сатабыллаахтык салайдылар. Үһүс түһүмэххэ көлүөһэни муоска иилэн, туһааннаах сиргэ аҕалан олордо уурдулар. Онтон былаахтар быыстарынан эрийэ- буруйа айаннаатылар. Тыраахтарга киирии-тахсыы, муоһу түһэрии-таһаарыы, мүччү-хаччы туттуу барыта суоттанна-учуоттанна. Түөрт түһүмэхтэн үһүгэр бастаан, биирдэ үһүстээн оскуолаҕа суоппарынан үлэлиир, Бүлүүттэн төрүттээх күтүөт Герасим Кононов бастаата уонна сүрүн спонсор "Арктик колор" тэрилтэттэн тыраахтар охсорун бэлэх тутта. Василий Шестаков иккистээн, Константин Васильев үһүстээн, туһааннааҕынан мангал уонна аккумулятор ылан, үөрүүлэрэ үрдээтэ. Бары кыттааччыларга чугас дьонноро, удьуор механизатор сыдьааннара анал бириистэри туттардылар. Бу тэрээһин Туора Күөлтэн төрүттээх Саргылана Неустроева уонна кини дьиэ кэргэнин көҕүлээһининэн, дьаһалта, олохтоохтор сомоҕо күүстэринэн тэрилиннэ.