Ээйик сэлиэнньэтин таһынааҕы ойуур баһаарын умуруоруу күүһүрдэ — 25 июля 2026 г. в 02:51:03.739
Ээйик сэлиэнньэтин таһынааҕы ойуур баһаарын умуруоруу күүһүрдэ Өлөөн улууһун Ээйик сэлиэнньэтин аттыгар турбут ойуур баһаарын умуруорууга күүһү хаҥаталлар. Умуруоруу үлэлэрэ күүһүрдүллүбүт эрэһиимҥэ көстүлэр. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрдэ. Регионнааҕы диспетчерскэй сулууспа дааннайынан, билиҥҥи кэмҥэ баһаар кытыытыгар Авиалесоохрана парашюттаах-десантаах баһаарынай сулууспатын 28 үлэһитэ уонна 12 анал тиэхиньикэ үлэлиир. Үлэлиир бөлөҕү эбии хаҥатар сыалтан соторутааҕыта Ээйик сэлиэнньэтигэр өссө 16 парашютист уонна десантник-баһаарынай тиийбит. Ону тэҥэ эбии күүстэри салгын тырааныспарынан илдьии салҕанар. Баһаар миэстэтигэр бөртөлүөтүнэн Ньурба авиа-салаатын ПДПС 13 үлэһитэ уонна Ньурбаттан Судаарыстыбаннай баһаарынай сулууспа биэс үлэһитэ айаннаан иһэллэр. СӨ Экологияҕа министиэристибэтигэр бэлиэтииллэринэн, наада буоллаҕына, уоту умуруорууга кыттар исписэлиистэр ахсааннара элбиэҕэ. Эдьигээн авиа-салаатын саппааһа толору бэлэм олорор. «Күүс тиийбэт түгэнигэр Эдьигээн авиа-салаатын ПДПС 23 үлэһитин аҕалыахпыт. Кинилэр бэлэм олороллор», — диэн СӨ экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Андрей Коноплев иһитиннэрдэ. Андрей Коноплев этэринэн, күүһү уонна сириэстибэни суһаллык хаҥатыы баһаары умуруоруу көдьүүһүн үрдэтиэҕэ уонна Ээйик сэлиэнньэтин таһыгар уот салгыы тарҕанарын тохтотуоҕа. Хаартыска: sakha.gov.ru