Сунтаарга аҕам саастаахтарга анаан үөрэх уонна сынньалаҥ лааҕыра ситиһиилээхтик ыытылынна
Сунтаарга аҕам саастаахтарга анаан үөрэх уонна сынньалаҥ лааҕыра ситиһиилээхтик ыытылынна Сунтаар улууһугар Аҕам саастаахтар декадаларыгар аналлаах тэрээһиннэр үрдүк таһымҥа ыытыллаллар. Ол курдук, Норуот айымньытын киинин үлэһиттэрин көҕүлээһиннэринэн, аҕа көлүөнэ дьоҥҥо анаан түөрт күннээх анал лааҕыр тэрилиннэ. Бу бырайыак аҕам саастаахтар уопсастыба олоҕор көхтөөх кыттыыларын хааччыйар уонна кинилэр сомоҕолоһууларын күүһүрдэр сыаллаах ыытыллар. Тэрээһиҥҥэ барыта 50-тан тахса аҕа саастаах киһи бэрт көхтөөхтүк кытынна. Лааҕыр бырагырааммата олус баай уонна интэриэһинэй ис хоһоонноохтук ааста. Түөрт күн устата кыттааччыларга анаан араас хайысхалаах маастар-кылаастар, ол иһигэр ас-үөл кулинариятын кистэлэҥнэригэр үөрэтии уонна практическай дьарыктар үрдүк таһымҥа ыытылыннылар. Дьарыктары таһынан, лааҕыр кыттыылаахтарыгар анаан улуус суолталаах уонна саҥа тутуллубут эбийиэктэригэр экскурсиялар тэрилиннилэр. Эдэр көлүөнэ үөрэнэр, саҥа тутуллан үлэҕэ киирбит үөрэх кыһатыгар политехническэй лицейгэ сырыттылар. Ону таһынан, тыа сиригэр ураты суолталаах, аныгылыы тутуулаах «Байҕал» бассейн үлэтин кытта билистилэр. Лааҕыр биир саамай умнуллубат уонна доруобуйаны тупсарар түһүмэҕинэн Кэмпэндээйи нэһилиэгэр айан буолла. Кыттааччылар Кэмпэндээйигэ ыалдьыттаан, ураты айылҕалаах сир эмтээх туус бассейыныгар сылдьан, доруобуйаларын бөҕөргөтүннүлэр, сэниэ уонна күүс-уох ыллылар. Түмүктээн эттэххэ, Норуот айымньытын киинин үлэһиттэрин бу курдук тэрийэр үлэлэрэ аҕа көлүөнэ олоҕун таһымын тупсарыыга, кинилэр уопсастыба ортотугар бэйэлэрин наадалаахтарын өйдүүллэригэр уонна көхтөөх уһун үйэни ситиһиилэригэр улахан төһүү күүһүнэн буолар. Лааҕыр кыттыылаахтара тэрийээччилэргэ дириҥ махталы биллэрдилэр уонна маннык тэрээһиннэр инникитин да салҕаныахтара диэн эрэнэллэр. Сунтаар улууһун дьаһалтатын пресс-сулууспата