Саха сиригэр «НАУКА 0+» билим бэстибээлэ ыытыллыа
Саха сиригэр «НАУКА 0+» билим бэстибээлэ ыытыллыа Алтынньы 22-25 күннэригэр «НАУКА 0+» билим бэстибээлэ буолуоҕа уонна билим институттарын, чинчийэр кииннэри, бастыҥ үөрэх тэрилтэлэрин түмүөҕэ. Бэстибээл дойду бэрэсидьиэнэ Владимир Путин биллэрбит Россияҕа Билим уонна технология уон сылын чэрчитинэн тэриллэр. Быйылгы бэстибээл сүрүн тиэмэтэ – «Твоя космическая Вселенная», киһи куйаарга аан бастаан тахсыытын 65 сылыгар ананар. Ураты болҕомтону икки үбүлүөйдээх бэлиэ түгэҥҥэ ууруохтара – М.К.Аммосов аатынан Хотугулуу-Илиҥҥи федеральнай университет 70 сылыгар уонна Саха сирин аграрнай үөрэхтээһинин 70 сылыгар. Түөрт күн устата өрөспүүбүлүкэ олохтоохторугар аҕыс былаһааккаҕа 179 тэрээһини ыытыахтара. Бэстибээл бырагыраамата киэҥ хабааннаах – оскуола оҕолоругар, устудьуоннарга уонна педагогтарга, эдэр чинчийээччилэргэ, билим саҥа ситиһиилэрин сэргиир бары баҕалаахтарга туһаайыллар.