Саха сирин харах балыыһатыгар телемедицинскэй киин арыллыаҕа
Саха сирин харах балыыһатыгар телемедицинскэй киин арыллыаҕа Өрөспүүбүлүкэ офтальмологическай балыыһатын баазатыгар телемэдиссиинэ киинэ тэриллэн, улуустааҕы балыыһалар үлэһиттэрин кытта ыраахтан сүбэлэһиини ыытыаҕа. Пилотнай бырайыакка Саха сирин биэс улууһа кыттар, ол иһигэр Арктика улуустара. Киини бу сыл сэтинньитигэр үлэлэтэр былаан баар. «Мин көрдөхпүнэ, бу — улахан хардыы. Офтальмологтара суох улуустартан биһиэхэ элбэх көрдөһүү киирэрэ. Пилотнай бырайыакка Жатай, Өлөөн, Чурапчы, Ньурба уонна Кэбээйи улуустара кытталлар. Бастакы түһүмэххэ Жатай уонна Өлөөн улуустарын талыы оптоволокно ситимэ тардыллан дааннайдары биэрии түргэнин кытта сибээстээх. Бу сүбэлэһиини онлайн ыытарга кыаҕы биэрэр», — диэн Дьокуускайдааҕы өрөспүүбүлүкэ офтальмологическай балыыһатын сүрүн бырааһа Иван Луцкан эттэ. Билигин улуустар киин балыыһаларын биэлсэрдэрэ офтальмологияҕа уонна оптометрияҕа сиэстэрэ дьыалатыгар күүстээх кууруһу бара сылдьаллар, диагностикалыыр ньымалары баһылыыллар уонна саҥа тэрилгэ үлэлииргэ үөрэнэллэр. «Бу күннэргэ биһиги Өлөөнтөн кэлбит биир идэлээхпитин кытта диагностика хайдах ыытылларын үөрэтэбит, щелевой лаампанан үлэлииргэ үөрэнэбит. Кууруспут бүтүннүү Дьокуускайдааҕы харах балыыһатын баазатыгар барар. Биһиэхэ бу букатын саҥа эйгэ, олус интэриэһинэй», — диэн Жатайдааҕы киин балыыһа биэлсэрэ Светлана Евсеева үллэһиннэ. Телемэдиссиинэ көмөтүнэн офтальмологическай балыыһа быраастара улуустарга сылдьар мэдиссиинэ үлэһиттэригэр харах наадалаах структураларын көрөргө линзаны хайдах туруорары, барыллаан диагностиканы бигэргэтэри эбэтэр утарары ыраахтан сылдьан көмөлөһөр кыахтаныахтара. «Улуустааҕы балыыһа үлэһитэ хаартыскаҕа, видеоҕа түһэрэр систиэмэлээх щелевой лаампаны кытта үлэлиэҕэ, оттон биһиги исписэлииспит экраҥҥа көстөр уобараһы көрөн диагностикалыаҕа. Бу СӨ Доруобуйа харыстабылын министиэристибэтин өйөбүлүнэн уонна Ил Дархан Айсен Николаев көҕүлээбит бырайыактарынан кыалынна», — диэн Луцкан бэлиэтээтэ. Хаартыска: Дьокуускайдааҕы өрөспүүбүлүкэ офтальмологическай балыыһатын пресс-сулууспата