Дьокуускайга «Сыыппара алмааһа» форумҥа кибератаакалартан көмүскэнэр боппуруостары дьүү...
Дьокуускайга «Сыыппара алмааһа» форумҥа кибератаакалартан көмүскэнэр боппуруостары дьүүллэһиэхтэрэ Кибератаакалары утары охсуһуу, иһитиннэрэр систиэмэлэри харыстааһын уонна сыыппара сервистэрин куттала суох буолууларын хааччыйыы боппуруостара ахсынньы 3–5 күннэригэр Дьокуускай куоракка ыытыллар «Сыыппара алмааһа» форум тиэмэлэриттэн биирдэстэрэ буолуоҕа. Былаас уорганнарын, IT-хампаанньалар, сибээс оператордарын бэрэстэбиитэллэрэ уонна эспиэрдэр аныгы киберкутталлары, кинилэри кэмигэр быһаарар ньымалары уонна сыыппара инфраструктурата көмүскэллээх буоларын хааччыйар дьаһаллары дьүүллэһиэхтэрэ. Сыыппара инфраструктуратын сайдыыта уонна дааннайдары харыстааһын таһымын үрдэтии РФ Бэрэсидьиэнэ Владимир Путин көҕүлээбит «Экономика данных и цифровая трансформация государства» национальнай бырайыак чэрчитинэн судаарыстыбаннай бэлиитикэ сүрүн хайысхаларынан буолаллар. «Биһиги тэрилтэбитигэр иһитиннэрэр систиэмэлэр туруктаахтык үлэлииллэрэ, оттон дааннайдар харысхаллаах буолуулара суолталаах. Кибератаакалар үксүгэр боростуой туһанааччыга биллибэттэр, ол эрээри сервистэр үлэлэригэр харгыстары уонна суолталаах иһитиннэриини сүтэриини аҕалыахтарын сөп. Түүннэри-күнүстэри кэтээн көрүү уорбаланар хамсааһыны түргэнник быһаарарга уонна тахсыан сөптөөх кутталлары кэмигэр буларга көмөлөһөр. Бу биһиги сыыппара инфраструктурабыт куттала суох буолуутугар эбии эрэллээх буолуу», — диэн СӨ кибератаакалары утары охсуһар киинин кэтээн көрүүтүгэр холбоммут тэрилтэ бэрэстэбиитэлэ бэлиэтээтэ.