Ылбаҕай ырыалаах, дорҕоонноох хоһооноох: Дьокуускайга саҥа талааннар арылыннылар
Ылбаҕай ырыалаах, дорҕоонноох хоһооноох: Дьокуускайга саҥа талааннар арылыннылар Дьокуускай куорат олохтоммута 394 сылыгар анаан, Семен уонна Софрон Даниловтар ааттарынан скверга «Дьокуускайым, ыллыыр-айар…» диэн ураты хоһоон уонна ырыа күрэҕэ үрдүк таһымнаахтык буолан ааста. Бырааһынньыктааҕы тэрээһин араас көлүөнэ дьонун — оҕолору, ыччаттары, айар куттаахтары — биир түһүлгэҕэ түмтэ. Күрэс сүрүн сыала — куораппытын хоһуйуу, кини сайдар кэскилин туойуу уонна саҥа талааннары киэҥ эйгэҕэ таһаарыы буолар. Күрэскэ уопсайа 24 айар куттаах дьон кытыннылар. Кинилэр ортолоругар биирдиилээн толорооччулар да, ис киирбэх дуэттар да бааллара көрөөччүнү соһутта уонна үөртэ. Хас бирдии кыттааччы бэйэтин ураты толоруутунан Дьокуускайга анаммыт истиҥ тапталын долгуйан туран тиэртэ.Тэрээһин биир саамай чаҕылхай уонна долгутуулаах түгэнинэн биллиилээх поэтесса Полина Победа кыттыыта буолла. Кини бэйэтэ суруйбут «Тапталлаах Дьокуускай куоратым» диэн хоһоонун олус дорҕоонноохтук, ис дууһатыттан ааҕан истээччилэр куттарын тутта. Тэрээһини, «Арчы Дьиэтэ» ДКК иһинэн үлэлиир «Ньургуһуннар» ырыа бөлөҕө «Дьокуускайым» диэн ырыанан дохсуннук түмүктээтэ. Бу тэрээһин, кэлбит ыалдьыттарга барыларыгар ураты истиҥ иэйиини, төрөөбүт дойдуга бэриниилээх буолууну уонна тапталлаах Дьокуускай куоракка сылаас сыһыаны бэлэхтээтэ. Күрэскэ кыттыбыт кыттааччыларга өссө да үрдүк ситиһиилэри, айар үрдэллэри баҕарабыт. Любовь Константинова #ДеньГорода394