Есиповская летопись (по Головинскому списку).
Есиповская летопись (по Головинскому списку). КРАТКОЕ ОПИСАНИЕ О СИБИРСТЕЙ ЗЕМЛИ И О ПОХОЖДЕНИИ ΑΤΑΜΑΗΑ ΕΡΜΑΚΑ. От царствующаго града Москвы на восточную страну есть царство Сибирское, въ нем же живяше царь Кучюмъ, вѣра же ихъ бусурманская Маамѣтова закона, а инія языцы кумиромъ служаху и ідоломъ покланяхуся, иные жъ Чюдь заблудящие вѣры, и закону они не знаху. Отсюду жъ начахомъ глаголати, како покори Богъ подъ руку царству Московскому. Есть бо на полуденную страну река, глаголемая Донъ, на ней же живяху казаки; отъ Дону жъ не въ далномъ разстояніи река, глаголемая Волга, на ней же казаки живуще і вороваху много по Волге и по инымъ рѣкамъ, овогда суды государевы громяху, овогда жъ пословъ кызылбашскихъ и Бухарцовъ и иныхъ многихъ грабиху и побиваху. Царь же Іванъ Васильевичь виде ихъ воровство и злое непокорство, посла на нихъ воеводъ своихъ и повѣле ихъ тамо имати и вѣшаті; многихъ же имающе казняху, а иные аки волки разбѣгошася по Волге жъ въ верхъ. Отъ нихъ побѣгоша 600 человѣкъ по присылке Максима Строганова; въ нихъ же старѣйшина атамань, рекомыі Ермакь [Тимофеев сын Поволский], и іные многие атаманья. И доидоша до рѣки до Камы, а Камою въ верхъ дошли до Чюсовоi, до вотчины Строгановыхъ; тутъ же разпрошаху тутошнихъ живущихъ людеі, къ которому царству та земля подошла. Они же имъ повѣдаша: «Есть де отсюду не въ далномъ разстояніи царство, рекомое Сибирское, в немъ же живѣтъ царь Кучюмъ». Тоі же Ермакъ изготовя себѣ [и дружинѣ своей] запасу і взя с собою тутошнихъ людеі 50 человѣкъ и поиде рекою Серебренкою въ верхъ, и переволокли суды своя въ реку Тагиль; а Тагиломъ доиде до ріки Туры, а Турою рекою доіде до рѣки Тоболу, а Тоболомъ доиде до рѣки Иртиша, а рѣкою Иртишемъ доіде до города, гдѣ живѣтъ царь Кучюмъ, и пріиде на то царство Сибирское. И быша бои с ними по многи дни, и Божіимъ изволениемъ лѣта 7089 году, октября въ 26 день, на память святаго великомученика Димитрия Селунского, взяша царство Сибирское. Царь же Кучюмъ побѣже; Ермак же сяде въ царствѣ Сибирстемъ и посла къ великому государю царю къ Москвѣ с сеунчомъ казаковъ в 50 человѣкъ. Ермак же нача подъ царскую руку подводить всю Сибирскую землю и приводить къ шерти; иніи же не покоришася, и сихъ пленяше и побиваше. Царь же Иоаннъ Васильевичь тѣхъ сеунчиковъ пожаловаль, а с ними послалъ въ Сибирь воеводъ своихъ князь Семена Болховского да Івана Глухова, и къ Ермаку и к атаманомъ его и казакомъ посла свое государево великое жалование, а Ермака повѣле государь написать в грамотах Сибирскимъ княземъ. Ермак же въ Сибири повоева многие мѣста. И бысть бой на реце Вагае, и на томъ бою поимаша царевича Маметкула Кучюмова сына и послаша его къ Москвѣ со многими воинскимі людми. До того жъ ихъ приезду, Богу тако изволившу, благочестивый государь царь і великій князь Іоаннъ Васильевичь ко Господу отъиде, преставися. По преставленіи же царя Іоанна Васильевича держа скипетръ Московскаго царства сынъ его благочестивыі царь Ѳеодоръ Івановичь, и на приѣзде того царевича Маметкула пожаловаль, тако жъ и служилыхъ людей пожаловаль. Воевода жъ князь Семенъ Болховской по пришествіи своемъ въскорѣ преставися. И пріиде вѣсть къ воеводе и къ Ермаку, что идутъ въ Сибирь с торгомъ Бухарцы; Ермак же взя с собою 150 человѣкъ казаковъ и поіде противъ Бухарцовъ къ рѣце Вагаю и не доіде до реки и ста начеваті въ пролетѣ, и утрудишася велми, начаша спати, и ни единаго отъ нихъ стража не бысть. Царь же Кучюмъ увѣде ихъ на острову еже спящихъ; бысть же у него Татаринъ въ смертної винѣ и казни, и рече ему Кучюмъ царь: «Поиді и отвѣдаі мнѣ в рѣке броду; толко отвѣдаешъ я тебя свобожу отъ казни и пожалую». Татарин же рѣку перебрелъ и виде ихъ спящихъ; пришедъ же и повѣда Кучюму, яко спять вси. Сим же рѣчамъ Кучюмъ не повѣря паки посла его въ другое и рече: «Возми у нихъ, что мочно взяти». Татаринъ же егда пріиде въ другое и украде у казаковъ пищаль и лядунку и принѣсе Кучюму. Видевъ же царь Кучумъ и перебредъ рѣку со всѣми своими воинами и Ермака и казаковъ поби; един отъ нихъ казакъ утече въ городъ къ воеводѣ с вестью. Текст полностью