Присоединение Перми Великой к Русскому государству.
Присоединение Перми Великой к Русскому государству. Рассказ из Лицевого летописного свода. О Великой Перми. Тое же зимы (6980/1472) послал князь Великий на Великую Пермь князя Феодора Пестрого воевати их за их неисправление. Он же шед Пермь Великую взял. Того же лета, иуниа 26, прииде весть к великому князю ис Перми, что воевода князь Феодор Пестрой землю Пермскую взял. А пришел в землю ту на усть-Черные рекы на Фоминой неделе в четверг, и оттуду поиде на плотех и с конми, и, приплыв под город Анфаловъской, съиде с плотов и поиде оттуду на конех на верхнюю землю к городку Искору, а Гаврила Нелидова отпустил на Нижнюю землю, на Урос, на Чердыню да на Почку, на князя на Михаила. Князю же Феодору не дошедшу еще городка Искора, и сретоша его пермичи на Колве ратью, и бысть им кой межь собою, и одоле князь Феодор, и поимал на том бою воеводу их Кача. И оттуду князь Феодор поиде тако ко Искори и взят его, и воеводы их поимал, Бурмота да Мичкина, а Зынар по опасу пришел к нему; поимал же и иные городкы, и пожегл. А Гаврил, шед, те места повоевал, на которое послан. И потом прииде князь Феодор на устие Почки, где впала в Колву. И съждася тамо со всеми своими, а поиманых тех туто же приведе. Срубивше ту городок, сяде в нем, и приведе всю землю ту за великого князя. И оттуду послал князь Феодор князя Михаила к великому князю, и тех Бурмота и Мичкина и Качя, а сам остался тамо в городке Почке, а что имал у тех у Бурмота и Мичкина и Качя, а то послал к великому князю: 16 сороков соболей, да шубу соболию, да полтретьятцеть постаков сукна, да три пансыри, да шелом, да две сабли булатные.