Чурапчы Холкуостарын Көһөрүү Кэриэһигэр 🕯️
Чурапчы Холкуостарын Көһөрүү Кэриэһигэр 🕯️ Бу күн, балаҕан ыйын 19 күнэ, Чурапчы улууһун историятыгар умнуллубат, ыар суоллаах күн. Чурапчы көһөрүүтүн алдьархайа – бу бүттүүн саха омугун ыар алдьархайа. Бу харах уулаах быһылаан историяҕа “Чурапчы алдьархайа” диэн аатынан киирбитэ. Ол курдук, 1939 сылтан турбут хас да сыллаах кураан Чурапчы улууһугар ордук суоһаабыта. Кыһын хаар түспэккэ, сайын аһыҥа ыһан сир-дойду ото-маһа үүммэккэ харанан көрбүтэ. Мантан улахан аччыктааһын тахсыбытыгар, былаас чурапчылары хоту улуустарга балыктата ыытарга диэн уһуну-киэҥи ырыппакка суһал дьаһал таһаарбыта. Чурапчы оройуонун колхуостарын хоту балык булдугар көһөрөргө күһэйии 1942 с. атырдьах ыйын 11 күнүгэр 213№-дээх уураахха баттаммыта. Чурапчы улууһуттан 41 колхуос, 5318 киһилээх 1850 хаһаайыстыбаны, төрөөбүт төрүт буордарыттан күүс өттүнэн Кэбээйи, Булун, Эдьигээн улуустарыгар ыыппыттара. Балаҕан ыйын 18 күнүгэр Одьулуун нэһилиэгин олохтоохторугар көһөрүллүү 84 сылынан кэриэстэбил буолан ааста. Биһиги оҕолорбут, учууталларбыт миитиҥҥэ кыттыыны ылан, пааматынньыкка сибэкки дьөрбөтүн уурдулар. Ааспыт ахтылыннын, урукку умнуллубатын! Ийэ сиргэ аламай күн өрүү чэмэличчи тыктын, сылааһынан угуттаатын!