Одьулуун оскуолатыгар Суорун Омоллоон 120 сылыгар аналлаах литературнай марафон буолан ...
Одьулуун оскуолатыгар Суорун Омоллоон 120 сылыгар аналлаах литературнай марафон буолан ааста Оскуола библиотекаларын декадатын чэрчитинэн, Одьулуун орто оскуолатыгар Саха народнай суруйааччыта Д.К. Сивцев – Суорун Омоллоон төрөөбүтэ 120 сыллаах үбүлүөйүгэр анаммыт «Харыстаа талааҥҥын, дьолгун...» диэн литературнай марафон ыытылынна. Бу тэрээһин оскуола үөрэнээччилэрин уонна педагогтарын биир сомоҕо гына түмтэ. Педагог-библиотекарь Туйара Максимова суруйааччы олоҕун уонна баай айар үлэтин сырдатар быыстапканы тэрийдэ. Марафон кэмигэр кыттааччылар Суорун Омоллоон үйэлээх айымньыларын олус көхтөөхтүк талан аахтылар: • Алын уонна орто сүһүөх оҕолоро ордук чуолаан «Күөрэгэй уйата», «Доҕоттор», «Бээчэ бэргэһэтэ», «Тиэтэйбит сааһыт», «Эһиги ийэҕит», «Муммут уолаттар», «Саһыл уонна эһэ», «Чөркөй уонна хаххан», «Дьол чорооно», «Үчүгэй үөдүйээн», «Сордоох суха», «Чөөчө», «Чүөчээски», «Күөх сирэмҥэ» айымньылары сэргээн талан аахтылар. • Улахан кылаастар уонна учууталлар суруйааччы ордук дириҥ ис хоһоонноох «Аанчык», «Охоноон», «Хараҥаҕа тыкпыт сырдык», «Бэйэтэ эмтиэкэ», «Бастакы дьарапылаан» айымньыларын талан ааҕан иһитиннэрдилэр. Ону тэҥэ, тэрээһин кыттыылаахтара суруйааччы айымньыларынан экранизацияламмыт «Аанчык», «Дьарапылаан» уонна «Хараҥаҕа тыкпыт сырдык» диэн киинэлэри кытта сиһилии билистилэр. Улуу суруйааччыбыт үбүлүөйүгэр анаммыт литературнай марафон үүнэр көлүөнэҕэ төрөөбүт тылбыт күүһүн өйдөтөн, норуот суруйааччыта Суорун Омоллоон үйэлээх нэһилиэстибэтин көлүөнэттэн көлүөнэҕэ тиэрдэр кэрэ бэлиэ түгэнинэн буолла. Бу уонна да атын тэрээһиннэр тустарынан видеолары оскуола библиотекатын Rutube ханаалыгар киирэн көрүөххүтүн сөп: https://rutube.ru/video/74b53e566a581f32adad1b0313e79c5b/