Владислав уонна Валерий - элбэх улуустааҕы, өрөспүүбүлүкэтээҕи турнирдар кыайыылаахт... — 27 мая 2026 г. в 22:22:02.351
Владислав уонна Валерий - элбэх улуустааҕы, өрөспүүбүлүкэтээҕи турнирдар кыайыылаахтара, үс Манчаары оонньууларын кыттыылаахтара, уопсайа саха оонньууларын 7 көрүҥүн нуорматын толорон маастар үрдүк аатын ылары ситистилэр. “Сайдыы” оҕо айымньытын дьиэтин дириэктэрэ уонна "Хабылык, хаамыска" куруһуок салайааччыта Анастасия Николаевна Винокурова: “Уолаттар биһиэхэ бастакы кылаастан оскуоланы бүтэриэхтэригэр диэри утумнаахтык дьарыктанан, үгүс күрэхтэһиилэргэ сатабылларын чочуйан маастар нуорматын толорбуттарынан олус диэн киэн туттабыт. Бастакы тренердэрэ Андрей Петрович сыралаах үлэтин салҕаан, сайыннаран маннык ситиһии кэллэ”, - диэн үөрүүтүн тиэрдэр. Билигин Владислав - И.Е. Винокуров аатынан Намнааҕы педагогическай колледж физкультурнай салаатыгар, Валерий - М.К. Аммосов аатынан Хотугулуу-Илиҥҥи федеральнай университет геолого-разведочнай факультетыгар ситиһиилээхтик үөрэнэллэр, дьарыктаналлар. Владиславы, Валерийы, кинилэр тренердэрин спорт национальнай көрүҥнэригэр “Саха өрөспүүбүлүкэтин спордун маастара” үрдүк аат иҥэриллибитинэн ис сүрэхпититтэн эҕэрдэлиибит. Нам улууһун чиэһин араас таһымнаах күрэхтэһиилэргэ чиэстээхтик көмүскүүргүтүгэр махталбытын тиэрдэбит. Өссө да кыайыылар кэлэ турдуннар, саҥаттан саҕа чыпчааллары дабайан иһиҥ, спорт туонатыгар суолгут куруук аһаҕас, өрө тахсыылаах буоллун! “Нам улууһа” МО пресс-сулууспата