Айар куттаах Вера Исакова хоһоон суруйуутунан дьарыктаммыта ыраатта. Элбэх улуустааҕы... — 7 декабря 2025 г. в 04:00:18.302
Айар куттаах Вера Исакова хоһоон суруйуутунан дьарыктаммыта ыраатта. Элбэх улуустааҕы уонна өрөспүүбүлүкэтээҕи хоһоон суруйуутун күрэхтэригэр ситиһиилээхтик кыттар. Оҕо эрдэҕиттэн ырыаһыт, үҥкүүһүт, култуура, онон ускуустуба кэрэ эйгэтигэр кыратыттан сыстыбыт киһи буолар. Сүрэхтэнэр саҥа кинигэтэ Дьокуускай куоракка бэчээттэннэ, үбүн-харчытын уйунарга “Регион-Сервис” ХЭТ дириэктэрэ Андрей Ядрихинскай көмөлөспүт. Олоҥхо курдук уустук эйгэҕэ саҥа кинигэ тахсыытын сэҥээрэн, бастакы сүрэхтэнии Дьокуускай куоракка Музыка уонна Саха сирин норуоттарын фольклорун түмэлигэр үрдүк тэрээһиннээхтик буолан ааспыта. Онтон бу күннэргэ Вера Егоровна тапталлаах дойдутугар, төрөөбүт нэһилиэгэр Сулҕаччыга олоҥхотун кинигэтин бар дьонун кытта сүрэхтээтэ. Кинигэ сүрэхтэниитин СӨ үөрэҕириитин туйгуна Венера Данилова салайан ыытта. Дьоро киэһэҕэ ааптары И.И. Константинов-Дэлэгээт Уйбаан аатынан Сулҕаччы орто оскуолатын дириэктэрэ Иван Окороков, “Чычып-чаап” уһуйаан сэбиэдиссэйэ Анна Баишева, Миитэрэй Наумов аатынан библиотека иһинэн үлэлиир “Суһум” түмсүү салайааччыта Елена Попова эҕэрдэлээтилэр. Маны сэргэ Вера Егоровна үлэлиир оскуолатын уонна уһуйаанын иитиллээччилэрэ, кини олоҥхоҕо уонна саха норуотун тылынан уус-уран айымньыларыгар уһуйар куруһуогун иитиллээччилэрэ кыттыыны ылан киэргэттилэр. Оҕолор бу “Дьулусханнаах сырыылаах Дохсун Ньургустай” олоҥхону туруоран улуустааҕы “Чуопчаарар оҕо саас” күрэххэ 2-с степеннээх лауреат үрдүк аатын ылбыттара. Төрөппүттэр ис хоһоонугар сөп түбэһиннэрэн төрөппүттэр таҥас-сап тикпиттэр. Таҥас эскиһин иитээччи Надежда Рязанскаяны кытта сүбэлэһэн оҥорон, тигэн өрөспүүбүлүкэтээҕи “Косплей” муода күрэҕэр кыттыыны ылан, Вера Егоровна “Опыт тарҕатааччы” анал аат хаһаайкатынан буолбута. Улахан кэрэхсэбиллээҕэ, бу олоҥхо хас биирдии персонаһар анаан тарбах куукулалар тигиллибиттэрэ буолар. Куукулалар сирэйдэрин Вера Егоровна бэйэтэ заказтаан, атыылаһан аҕалбыт. Салгыы оскуолаҕа төрөппүттэргэ маастар-кылаас ыытан, онно үөрэтэ таарыйа кырааскалаан, ойуулаан-дьүһүннээн биэрбиттэр. Куукулалар сирэйдэрэ бэлэм буолааттарын кытта, аны уһуйаан иитээччилэрэ Надежда Рязанская, Алена Ефремова, Роксана Стручкова, иитээччи көмөлөһөөччүлэрэ Чэмэлиинэ Христофорова, Туйаара Неустроева хас биирдии персонажка анаан таҥаһын-сабын сөрү-сөпкө, бу олоҥхо геройун хараахтарыгар сөп түбэһиннэрэн тикпиттэр.