🇷🇺🇷🇺🇷🇺*СОМОҔОЛОҺУУ КҮНЭ*🇷🇺🇷🇺🇷🇺
🇷🇺🇷🇺🇷🇺*СОМОҔОЛОҺУУ КҮНЭ*🇷🇺🇷🇺🇷🇺 Сунтаар нэһилиэгэр олус сэргэх, астык күн ааста. Олохтоох дьаһалта уонна «Туску» түөлбэ олохтоохторо байанай ыйын көрсө, сомоҕолоһуу күнүгэр муҥха тэрийдилэр. Сарсыарда эрдэ 9ч мустан сүүрбэттэн тахса массыына, түөлбэ олохтооҕо, нэһилиэк дьокутаата Борис Васильев тэрилтэ автобуһун кэпсэтэн, тобус толору сатыы дьону олордон муҥхалыыр сирбитигэр барааттаан айаннаатыбыт. "Көрдүгэн" күөлгэ тиийэн саха буоларбыт быһыытынан, аал уоту оттон айах тутан, күөх боллохтон көрдөһөн кэлбит ыалдьытын кырыы хараҕынан көрбөккө, илии тутуурдаах ыытарыгар көрдөһөн алаадьынан күндүлээтибит. Оҕолор элбэхтэрэ үөртэ, эр дьон да кэлэ сатаабыттар, дьиэ хаһаайкалара да баһаамнар, уопсайа сүүсчэ киһи тоҕуоруһа муһунна. Сиэр-туом кэннэ эр дьон бары күөлгэ муҥха түһэрэ киирдилэр, хаалбыт оҕолор, кэрэ аҥаардар хамаанда бэлэмнэнэн ыраахха хаатыҥка быраҕын кииристилэр, оҕолор хаарынан сүүрэн куоталастылар. Ол кэмҥэ "Туску" түөлбэ салайааччыта Надежда Павлова, көхтөөх олохтоохтор Анна Лекяева, Наталия Кокарева, Геннадий Ераскумов уот оттон күөс, чэй оргутан бэлэмнээтилэр. Муҥха түһэн, сынньалаҥ кэмигэр эр дьон хомуур хапсаҕайыгар хамаанданан кииристилэр. Үс күрэс түмүгүнэн 🥇 "Хомустаах", 🥈"Абаҕа", 🥉 "Сомоҕо" хамаандалара буоллулар. Бу күөл түөрт куул көмүс хатырыктааҕыттан бэристэ. Итии, сибиэһэй идэһэ этиттэн күөстэммит миининэн күндүлэнэн эбиэттээн, күүс-уох эбинэн иккис "Ойбон" күөлбүтүгэр айан туттубут. Күөс этин түөлбэ олохтооҕо, улуус депутата Григорьев Дмитрий Дмитрьевич көмө оҥорон, "Чебурашка" оҕо сайдар киинин үлэһиттэрэ минньигэс алаадьы астаан муҥхаһыттары күндүлээтилэр. "Ойбон" күөлгэ киириэх иннэ сир, аал уот, күөл иччититтэн көҥүллэтэн, алаадьынан айах тутан, сиэри-туому тутуһан киирдибит. Дьэҥкир уулаах, кэтит күөл үс куул көмүс хатырыктааҕыттан бэристэ, үөрүү үксээтэ. Эйэ дэмнээхтик байанай тосхойбут бэлэҕин үллэстэн, сомоҕолоһуу күнүн бэркэ бэлиэтээн илии тутуурдаах, өттүк харалаах тарҕастыбыт. Сонуну суруйда: Л. Тертюхова 04.11.2026 сыл
Канал в каталоге Максиметера
365 подписчиков · Госорганы и учреждения