*Күүстээх санаалаах уолаттар лааҕырдара: Сунтаарга «Быыһааччы» сезона арылынна* — 9 июня 2026 г. в 08:04:37.125
*Күүстээх санаалаах уолаттар лааҕырдара: Сунтаарга «Быыһааччы» сезона арылынна* 🔅🔅🔅Сунтаар улууһун быыһааччылара сыл ахсын ситиһиилээхтик тэрийэр «Спасатель» диэн уолаттарга аналлаах сайыҥҥы лааҕырдара быйыл эмиэ дьоһуннаахтык арылынна. Быйылгы сезоҥҥа улуус араас нэһилиэктэриттэн мустубут 16 хорсун уолаттар Устье сиригэр, айылҕа кэрэ тулатыгар дьарыктаныахтара уонна быыһааччы уустук идэтин сүрүн укулаатын кытта билсиэхтэрэ. Лааҕыр үөрүүлээх арыллыытыгар улуус баһылыга Анатолий Григорьев кыттыыны ылла. Кини быыһааччы уустук, ол эрээри бочуоттаах идэтигэр бастакы хардыыларын оҥоро сылдьар уолаттарга эр санааны, тулуурдаах буолууну, ситиһиилэри баҕарда. Сезон устата уолаттар уопуттаах инструктордар салайыыларынан сплав, бастакы көмөнү оҥоруу, экстремальнай балаһыанньаҕа бэйэни тургутуу курдук араас интэриэһинэй уонна практическай дьарыктары ааһыахтара. Быйылгы лааҕыр биир уратытынан уонна кэрэхсэбиллээх өрүтүнэн АБДь кыттыылаахтара бэйэлэринэн үөрэҕи ыытыахтара. Кинилэр уолаттарга эдэр быыһааччыларга төлөрүйбэт хорсун быһыы уонна Ийэ дойдуга бэриниилээх буолуу туһунан чахчы олохтоох холобурдары көрдөрүөхтэрэ, бэйэлэрин баай уопуттарыттан үллэстиэхтэрэ. Онон бу лааҕыр Ийэ дойду көмүскээччилэрин уонна хорсун быыһааччыларын иитэн таһаарарга улахан тирэҕинэн буолар. _Сунтаар улууһун дьаһалтатын пресс-сулууспата_