*Сунтаар улууһун медицинатын эйгэтигэр улахан суолталаах уонна долгутуулаах бэлиэ түгэн... — 1 июля 2026 г. в 03:37:46.728
*Сунтаар улууһун медицинатын эйгэтигэр улахан суолталаах уонна долгутуулаах бэлиэ түгэн: 23 эдэр фельдшер диплом тутта* 👩🏻⚕️🩺Сунтаар улууһун баһылыга Анатолий Григорьев көҕүлээһининэн Нерюнгритааҕы мэдиссиинэ колледжын кытта сөбүлэҥ чэрчитинэн, технологическай колледжы 23 устудьуон фельдшер идэтин ситиһиилээхтик баһылаата. Үөрэхтэрин туоһулуур дипломнарын үөрүүлээх быһыыга-майгыга туттулар. Бу тэрээһин улуус олоҕор устуоруйа буолан хатанарын Сунтаар улууһун баһылыгын социальнай боппуруостарга солбуйааччыта Мирослав Иванов бэйэтиҥ киирии тылыгар өрө көтөҕүллүүлээхтик бэлиэтээтэ. Кини эдэр исписэлиистэр улуус доруобуйа харыстабылын сайдыытыгар саҥа күүс-көмө буолалларын уонна нэһилиэктэргэ мэдиссиинэ көмөтө өссө таһымнаах буоларыгар олук ууралларын эттэ. Үөрэх хаачыстыбата үрдүгүн туоһулаан, 23 бүтэрээччи ортотуттан 10 устудьуон үөрэҕин туйгуннук бүтэрэн, кыһыл диплом маанылаах хаһаайыттарынан буоллулар. Диплом туттарыытын саамай долгутуулаах өрүтүнэн эдэр исписэлиистэр мустубут дьон иннигэр ытык андаҕардарын ааҕан иһитиннэриилэрэ буолла. Кинилэр киһи олоҕун уонна доруобуйатын туһугар чиэстээхтик үлэлиэхпит диэн андаҕайбыттара хас биирдии киһи уйулҕатын хамсатта. Түмүккэ кинилэри иитэн-такайан, олох киэҥ суолугар таһаарбыт күндү учууталларыгар, уһуйааччыларыгар уонна улуус салалтатыгар муҥура суох махталларын эттилэр. _Сунтаар улууһун дьаһалтатын пресс-сулууспата_