«Сунтаар улууһа (оройуона)» муниципальнай оройуон дьаһалтата, оройуон дьокутааттарын Сэ... — 30 июня 2026 г. в 05:45:30.088
«Сунтаар улууһа (оройуона)» муниципальнай оройуон дьаһалтата, оройуон дьокутааттарын Сэбиэтэ С.А. Зверев-Кыыл Уолун аатынан улуустааҕы норуот айымньытын Киинин директора Алексей Дмитриевич Седалищевка күн күбэй ийэтэ, Надежда Прокопьевна Седалищева ыарахан ыарыыттан бу дьыл бэс ыйын 26 күнүгэр орто дойду олоҕуттан букатыннаахтык барбытынан дириӈ кутурҕаммытын биллэрэбит. Седалищева Надежда Прокопьевна Дьаархан нэһилиэгин олохтооҕо, педагогическай үлэ бэтэрээнэ, Учууталлар учууталлара, СӨ үөрэҕириитин туйгуна, түөрт оҕо амарах ийэтэ, уон сиэн, сэттэ хос сиэн тапталлаах эбээлэрэ 1948 сыллаахха олунньу 2 күнүгэр Сунтаар оройуонун Дьаархан нэһилиэгэр сэттэ оҕолоох Николаевтар дьиэ кэргэттэригэр иккис оҕонон күн сирин көрбүтэ. Дьаархан нэһилиэгэр оҕо сааһа ааспыта. Намнааҕы педагогическай колледжы ситиһиилээхтик бүтэрэн 1968 сылтан култуура эйгэтигэр 6 сыл үлэлээбитэ. 1968 сыллаахха олоҕун аргыһын, тапталлаах кэргэнин Дмитрий Дмитриевич Седалищевы көрсөн ыал буолан Дьаархан нэһилиэгин биир киэн туттар бас-көс дьиэ кэргэнэ буолан, мааны Далбар Хотун сырдык аатын үйэлэргэ хаалларда. Кэлин Хабаровскайдааҕы педагогическай институту ситиһиилээхтик бүтэрэн, идэтин үрдэтиммитэ уонна үөрэҕирии эйгэтигэр эҥкилэ суох бэриниилээхтик 39 сыл үлэлээбитэ. Надежда Прокопьевна активист бэрдэ этэ. Кини нэһилиэгин, оскуолатын чиэһин дуобакка, шахмакка, остуол тенниһигэр уонна араас таһымнаах күрэхтэһиилэргэ көмүскүүрэ. Ону үгүс наҕараадалара, махтал суруктара кини кыайыыга дьулуурун туоһулууллар. Надежда Прокопьевна олорбут олоҕо, дьиэ кэргэҥҥэ, төрөөбүт дойдуга уонна үлэҕэ-хамнаска бэриниилээх буолуу үрдүк холобура буоларын үөлээннээхтэрэ, биир дойдулаахтара, үөрэппит оҕолоро уонна чугас дьоно-сэргэтэ кэлэр кэнчээри ыччатыгар кэпсиэхтэрэ диэн эрэнэбит. Сунтаар улууһун баһылыга А.В.Григорьев Оройуон дьокутааттарын Сэбиэтин бэрэссэдээтэлэ У.Д.Попова