*Үүнүү өлгөм, былаан үрдүк: Тойбохой эдэр фермердэрэ улууһу комбикорманан хааччыйыахтара* — 20 августа 2026 г. в 08:28:02.144
*Үүнүү өлгөм, былаан үрдүк: Тойбохой эдэр фермердэрэ улууһу комбикорманан хааччыйыахтара* 🌾🌾🌾Сунтаар улууһугар тыа хаһаайыстыбатын эйгэтигэр уонна үүнүү хампаанньатын хаамыытыгар улахан болҕомто ууруллар. Улуус баһылыга Анатолий Григорьев уонна тыа хаһаайыстыбатын управлениетын салайааччытын солбуйааччы Григорий Готовцев Тойбохой нэһилиэгэр тиийэн үүнүү хампаанньатын үлэтин кытта билсистилэр. Нэһилиэккэ үлэлиир эдэр, кэскиллээх фермердэр Алексей Сидоров уонна Александр Егоров быйыл улахан ситиһиилээх үлэни көрдөрөллөр. Кинилэр уопсайа 280 гектардаах сиргэ эбиэс, сэлиэһинэй уонна ньэчимиэн курдук туһалаах үүнээйи араас көрүҥүн үүннэрбиттэр. Салайааччылар бэлиэтээбиттэринэн, быйыл үүнүү олус өлгөм. Бу кэрэ көстүү фермердэр былааннарын өссө кэҥэтэр кыаҕы биэриэҕэ. Билигин кинилэр былааны таһынан 280 туонна бородууксуйаны ылар сыалы-соругу туруоруналлар. Ылыллыбыт үүнүүнү фермердэр бэйэлэрин собуоттарыгар туһаныахтара. Кинилэр манна улуус хаһаайыстыбаларыгар олус наадалаах комбикорманы оҥорон таһаараллар. Онон Сунтаар улууһун сүөһүтүн-сылгытын аһылыга бэйэ оҥоһуутунан толору хааччыллар кыахтаныаҕа. Тустаах хаһаайыстыба таһаарыылаахтык үлэлииригэр уонна салгыы сайдарыгар улуус салалтата күүс-көмө буолар. Наадалаах сирдэри сүөһү киирэн алдьаппатын туһуттан, улуус анал программатынан 1 мөлүйүөн 200 тыһыынча солкуобай көрүллүбүт. Бу үбүнэн билигин сири күрүөлээһин үлэтэ ситиһиилээхтик ыытылынна. Эдэр фермердэр олохтоох аһы-үөлү оҥорон таһаарыыга уонна улуус экономикатын сайыннарыыга улахан кылааттарын киллэрэллэр. Кинилэргэ өссө үрдүк ситиһиилэри уонна былааннара барыта олоххо киирэригэр баҕарабыт! 📽Анатолий Григорьев сэлиэһинэй бааһынатыттан сиһилии кэпсиир. _Сунтаар улууһун дьаһалтатын пресс-сулууспата_