Ытыктабыллаах Сунтаар улууһун учууталлара, үөрэх эйгэтин үлэһиттэрэ, педагогтар!
Ытыктабыллаах Сунтаар улууһун учууталлара, үөрэх эйгэтин үлэһиттэрэ, педагогтар! Сунтаар улууһун дьаһалтатын, улуус депутаттарын Сэбиэтин уонна тус бэйэбит ааппытыттан Эһигини Учуутал күнүнэн ис сүрэхпититтэн итиитик-истиҥник эҕэрдэлиибит! Бу күн эһиги сыралаах, эппиэтинэстээх, ытык үлэҕитигэр махталга ананар. Оҕолорбут кэскиллээх олохторун түстүүргэ, билиигэ-көрүүгэ сирдииргэ, кинилэри үтүө киһи буоларга иитиигэ киллэрэр кылааккыт үрдүк. Эһиги күн аайы билиини эрэ биэрбэккит, оҕоҕо саамай сүрүнэ – киһи быһыытынан чочуллуутугар, сөптөөх олох суолугар үктэниитигэр өйөбүл, тирэх, уһуйааччы буолаҕыт. Учуутал оҕо олоҕор оруола улахан. Билиини-көрүүнү иҥэрэр, толкуйдуур, айар-тутар дьоҕурун сайыннарар, дьоһун, сиэрдээх киһи буола улаатарыгар кыһаллар. Эһиги талааҥҥыт, тулуургут, оҕолорго тапталгыт күүһүнэн үөрэнээччилэргит үөрэххэ-билиигэ тардыһыылара, уопсастыбаҕа туһалаах, бигэр тирэхтээх дьон буолан тахсыылара мэктиэлэнэр. Эһиги үлэҕит нөҥүө биһиги улууспут инники кэскилэ тутуллар. Бу бэлиэ күҥҥэ Эһиэхэ чэгиэн доруобуйаны, дьолу-соргуну, эппиэтинэстээх, норуот инники кэскилин түстүүр үлэҕитигэр саҥа ситиһиилэри, өйдүүр төрөппүттэри, талааннаах үөрэнээччилэри, дьиэ кэргэҥҥитигэр бигэ туругу, чугас дьоҥҥут тапталын уонна ытыктабылын баҕарабыт! Сунтаар улууһун баһылыга А.В.Григорьев Улуус депутаттарын Сэбиэтин бэрэссэдээтэлэ У.Д.Попова