Сунтаардар истиҥ көрсүһүүлэрэ — 6 сентября 2026 г. в 11:56:58.229
Сунтаардар истиҥ көрсүһүүлэрэ «Коркинныы олоруохха! Коркинныы айыахха!» диэн улуу тренер Дмитрий Петрович Коркиҥҥа аналлаах республикатааҕы таһымнаах быыстапка иккис күнүн тэрээһинин тэрийээччилэринэн, Олимпиада-76 үрүҥ көмүс призера, спорт үтүөлээх маастара, Иран норуотун «Улуу Пехлеван» диэн үрдүк аатын ылбыт Александр Николаевич Иванов биир дойдулаахтара – сунтаардар буоллулар. Тэрээһини бу бырайыак ааптара, көҕүлээн-тэрийэн ыытааччыта Татьяна Афанасьевна Гоголева аста уонна аҕыйах хонуктааҕыта биһиги кэккэбититтэн өлөн туораабыт биллиилээх писхолог, социолог, педагог, Саха Республикатын наукатын үтүөлээх деятелэ, Орто Халыма улууһун бочуоттаах гражданина Ульяна Алексеевна Винокурова чуо бу күн кистэнэринэн, кини сырдык аатын кэриэстээн сөҥүөрэн турууга ыҥырда. Дьэ ол кэнниттэн «Олимпиец Александр Иванов – Пехлеван дойдута Сунтаар» диэн тэрээһин алгыһынан саҕаланна. Бастакынан тылы ылбыт Сунтаар улууһун доруобуйаларыгар хааччахтаах спортсменнарын сүрүн тренерэ Афанасий Терентьевич Жараев, тустуук Александр Иванов ситиһиилэрин кэпсээтэ. Кини ордук, оччотооҕу Тустуу аан дойдутааҕы федерациятын (ФИЛА) президенэ Милан Эрцеган: «Иванов очень красивый борец. Он эталон! Иванов не столько борется, сколько играет… И его игра поразительно талантливая, легкая, виртуозная. Это тип будущего борца!», — диэн этиитин чорботон бэлиэтээтэ. Оттон «Первый борцовский» сурунаал редактора, тустуу туһунан хас да кинигэ ааптара Иван Барашков, ССРС үтүөлээх тренерэ Георгий Анатольевич Бураков Александр Иванов туһунан ахтыытын кэпсээтэ итиэннэ Александр Николаевич 75 сааһыгар анаан «Мой путь» диэн кинигэни хайдах суруйан, тэрийэн бэлэмнээбитин билиһиннэрдэ. Манна даҕатан эттэххэ, бу саҥа кинигэ үп-харчы кырыымчыгыттан иҥнэн толору тахсыбакка турар, ол эрэн, Д.П. Коркин тустууга түһүлгэтин көрсө быһаарылларыгар эрэниэххэйиҥ. Көрсүһүүгэ, Александр Николаевич олоҕун аргыһа, бэйэтэ этэринэн, олимпийскай кыһыл көмүс мэтээлэ – Варвара Афанасьевна ахтыыта дьон болҕомтотун тарта. Өссө Чурапчытааҕы спортивнай интернат-оскуола саҕаттан бэйэлэрин билсэн, студент сылларыгар ыал буолан, Александр Иванов тустуук буолан тахсан – туох баар кыайыытын, хомойуутун барытын тэҥҥэ үллэстэ сылдьар, кимнээҕэр даҕаны истиҥ киһитинэн буолар. Салгыы тэрээһин тосхолун быһыытынан, Сунтаар улууһун спордун уонна А.Н. Иванов олоҕун сиһилии көрдөрөр, саалаҕа тилэри тардыллыбыт быыстапканы көрүү-истии буолла. Бу наһаа истиҥник, үрдүк таһымнаахтык барбыт көрсүһүүгэ кыттыбыт ыалдьыттары сунтаардар сахалыы үгэһинэн – алгыстаах алаадьынан, уохтаах кымыһынан айах тутан күндүлээтилэр. Тэрээһин оһуохайынан түмүктэннэ. Бары сүрдээҕин астынныбыт. Сунтаардарга махтал! Биһиги маннык сырдатыыбытыгар быыстапка үлэтин барытын, этэргэ дылы, ыраас мууска ууран биэрбэппит. Хас биирдии сэҥээрбит киһи бэйэтэ быыстапкаҕа кэлэн экспонаттары сыныйан көрөрүгэр, билэригэр баҕарабыт уонна ыҥырабыт. Быыстапка сылтан сыл ахсын өссө кэҥээн, саҥаттан саҥа экспонаттарынан байытыллан иһэрин санатабыт. https://dzulurgan.ru/2026/09/suntaardar-istiҥ-kөrsүһүүlere/