*Сунтаар улууһун уонна бүтүн өрөспүүбүлүкэ киэн туттар дьонугар анаммыт сүрэхтэнии*
*Сунтаар улууһун уонна бүтүн өрөспүүбүлүкэ киэн туттар дьонугар анаммыт сүрэхтэнии* 📚📚📚Филология билимин доктора, профессор, олоҥхону чинчийээччи, СӨ наукатын үтүөлээх деятелэ, П.А. Ойуунускай аатынан СӨ судаарыстыбаннай бириэмийэ лауреата Василий Васильевич Илларионов 80 сааһын туолар үбүлүөйдээх бэлиэ күнүгэр анаан улахан суолталаах кинигэ сүрэхтэниитэ үрдүк таһымҥа ыытылынна. Бу саҥа тахсыбыт үлэ Сунтаар улууһугар киэҥник биллэр фольклорист, кыраайы үөрэтээччи Георгий Евгеньевич Федоров төрөөбүтэ 115 сылыгар ананан бэчээттэнэн таҕыста. Кинигэ ааптардарынан олоҥхону чинчийээччи В.В. Илларионов, Т.В. Илларионова уонна Е.Д. Николаева буолаллар. Сүрэхтэнии тэрээһинигэр улуус уонна өрөспүүбүлүкэ наукатын, култууратын эйгэтин биллэр-көстөр деятеллэрэ, юбиляр биир дойдулаахтара, аймах-билэ дьоно уонна суруйааччылар тоҕуоруһа муһуннулар. Кинилэр Василий Васильевич Саха сирин фольклористикатыгар, олоҥхону аан дойду таһымыгар таһаарыыга уонна чинчийиигэ киллэрбит сүдү кылаатын бэлиэтээтилэр. Маны тэҥэ, Сунтаар улууһун дьаһалтатын бэрэстэбиитэлэ Семен Глухарев көхтөөх кыттыыны ылла. Саха сирин улуу фольклориһа Георгий Федоров сыралаах үлэтин хомуйан, ырытан, бар дьонугар кинигэ гынан бэлэх ууммутун иһин дириҥ махталы тиэрдэн туран, кинигэ өссө да элбэх ааҕааччыны кынаттыа диэн бигэ эрэллээҕин эттэ. Сүрэхтэнии истиҥ эйгэҕэ, дириҥ ис хоһоонноохтук уонна үрдүк таһымнаахтык буолан ааста. Тэрээһин кыттыылаахтара уонна ыалдьыттара саҥа кинигэ ис хоһооно улахан туһалаах, наадалаах буоларын бэлиэтээтилэр. _Сунтаар улууһун дьаһалтатын пресс-сулууспата_