“Сунтаар улууһа (оройуона)” муниципальнай оройуон дьаһалтата уонна оройуон депутаттарын...
“Сунтаар улууһа (оройуона)” муниципальнай оройуон дьаһалтата уонна оройуон депутаттарын Сэбиэтэ Саха сирин спордун историятыгар дьоһуннаах суолу хаалларбыт, Саха Өрөспүүбүлүкэтин физическэй культуратын уонна спордун үтүөлээх үлэһитэ, Гражданскай килбиэн, РФ, СӨ За заслуги в развитии физкультуры и спорта, СӨ физкультураны уонна спорду сайыннарыыга кылаатын иһин, Мас тардыһыытын -саха спордун көрүҥүн сайыннарыыга киллэрбит улахан кылаатын иһин знактар туһааннахтара, ССРС спордун маастара, көҥүл тустууга, мас тардыһыыга, гиирэ спордугар өрөспүүбүлүкэ элбэх төгүллээх Кыайыылааҕа, Сахаада-Спорт Ассоциацияҕа ХХ үйэ спордун Лауреата, ДСО Урожай бочуоттаах үлэһитэ, СӨ физкультура уонна спорт бэтэрээнэ, «Хотой Бииктэр» диэн ытыктабыллаах аатынан киэҥник биллибит Сунтаар улууһун Бочуоттаах олохтооҕо, Сунтаар, Тойбохой, Арыылаах нэһилиэктэрин бочуоттаах олохтооҕо Николаев Виктор Макарович – Хотой Бииктэр ыарахан ыарыыттан олохтон туораабытынан дириҥ кутурҕаммытын биллэрэбит. Виктор Макарович 1946 сыллаахха балаҕан ыйын 23 күнүгэр Сунтаар улууһугар Уһун-Күөл нэһилиэгэр төрөөбүтэ. Оскуола кэнниттэн Саха государственнай университетын биолого-географическай факультетын үөрэнэн бүтэрбитэ. Сүрүн үлэтин тас өттүгэр кини олоҕун спорт эйгэтигэр анаабыта. Боксанан, көҥүл тустуунан, хапсаҕайынан, гиряны анньааһынынан утумнаахтык дьарыктаммыта. Мас тардыһыытыгар САССР спордун маастара. Манчаары спартакиадаларын үс төгүллээх чемпиона, Көмүс мас – золотая палка ЯГУ турнирын алта төгүллээх чемпиона. Мас тардыһыытыгар уонна атын да спорт көрүҥнэригэр өрөспүүбүлүкэ турнирдарын элбэх төгүллээх чемпиона. Саха спордун көрүҥнэригэр Дьокуускай куорат командатын чилиэнин быһыытынан отуттан тахса сыл столицабыт чиэһин үрдүк таһымҥа көмүскээбит үтүөлээх спортсмен. Виктор Макарович Саха сирин спордугар, чуолаан көҥүл тустуу, мас тардыһыытын сайдыытыгар киллэрбит кылаата сүҥкэн. Кини элбэх эдэр ыччаты спортка көҕүлээбитэ, үгүс тустуукка наставник, холобур буолбута. Бэйэтин төрөөбүт дойдутун, Сунтаарын улууһун кыайыыга муҥура суох дьулуурунан, күүстээх санаатынан уонна үрдүк маастарыстыбатынан ааттаппыт дьиҥнээх Саха бухатыыра этэ. Кинини алтыспыт дьоно кырдьыксыт, дьоҥҥо эйэҕэс, үтүө санаалаах, күүстээх характердаах киһинэн билэллэрэ. Виктор Макарович сырдык мөссүөнэ биһиги сүрэхпитигэр мэлдьи тыыннаах буолуоҕа, дьоһуннаах олоҕо, дьулуурдаах үлэтэ эдэр көлүөнэҕэ холобур буола туруоҕа. Кини аата Саха сирин спордун историятыгар кыһыл көмүс буукубанан суруллуоҕа. Виктор Макарович дьиэ кэргэнигэр, чугас дьонугар-сэргэтигэр өссө төгүл дириҥ кутурҕаммытын тиэрдэбит. Сунтаар улууһун баһылыга А.В.Григорьев Улуус депутаттарын Сэбиэтин бэрэссэдээтэлэ У.Д.Попова