*Тойбохойдооҕу оҕону иитэр кииҥҥэ ураты ис хоһоонноох тулаһа арылынна*
*Тойбохойдооҕу оҕону иитэр кииҥҥэ ураты ис хоһоонноох тулаһа арылынна* 🏡❤️Тойбохойдооҕу оҕону иитэр киин коллектива бэйэтин күүһүнэн уонна үтүө санаалаах дьон көмөтүнэн ураты оҥоһуулаах тулаһаны дьон-сэргэ иннигэр арыйда. Киин үлэһиттэрэ бэйэлэрин үлэлэригэр бэриниилээхтэрэ, хас биирдии оҕоҕо кыһаллыгас сыһыаннаахтара уонна олус айымньылаахтык үлэлииллэрэ бу оҥоһуллубут сквер уобараһыгар тута харахха быраҕыллар. Манна выпускниктар чуорааннары ыйыыр Аал Луук мастарыттан саҕалаан, анал байыаннай дьайыыга олохторун толук уурбут хорсун байыастарга аналлаах бэлиэҕэ тиийэ дириҥ ис хоһоонноох композициялар турдулар. Сквер хас биирдии муннугар турар монуменнар арыллыылара мустубут дьону уйадытар, долгутар ураты түгэнинэн буолла. Үөрүүлээх арыллыыга Сунтаар улууһун баһылыгын социальнай боппуруостарга солбуйааччыта Мирослав Иванов кыттыыны ылла. Кини бу улахан суолталаах уонна ураты үлэ ыытылларыгар күүс-көмө буолбут дьоҥҥо эҕэрдэ уонна махтал суруктарын туттарда. Сквер оҥоһуутугар улахан көмөнү оҥорбут дьонунан Степан Кардашевскай, Антон Иванов, Дмитрий Тен буолаллар. Маны таһынан үбүнэн, тутуу матырыйаалынан, бэйэлэрин сыралаах үлэлэринэн олус элбэх киһи көмөлөстө. Киин коллективыгар уонна үтүө санаалаах дьоҥҥо ис сүрэхтэн барҕа махталбытын этэбит уонна айар үлэҕэ өссө үрдүк ситиһиилэри баҕарабыт! Хас биирдии оҕо туһугар үлэлээбит сыраҕыт, үтүө сыһыаҥҥыт куруук үрдүктүк сыаналаннын! ✍️Сунтаар улууһун дьаһалтатын пресс-сулууспата