20-21 июнь көннәрендә Ырынбур шәһәрендә ике көнлек «Акыл фабрикасы» белем бирү проектын... — 23 июня 2026 г. в 14:51:04.526
20-21 июнь көннәрендә Ырынбур шәһәрендә ике көнлек «Акыл фабрикасы» белем бирү проектын үткәреп кайттык. Чараны, гадәттәгечә, форум проектлары белән презентациясе белән ачып җибәрдек. Алга таба Райнур моңарчы эшләнгән һәм эшләнеп килә торган проектлар турында сөйләде, киләчәккә планнар белән уртаклашты. Аннары Айзилә үзенең СМИ һәм блогерлар белән эшләү тәҗрибәсе белән бүлеште. Бу бигрәк тә медиа өлкәсендә эшләүче яшьләр өчен файдалы булды. Татар китабы йорты мөдире Айдар Шәйхин исә Ырынбурның ни өчен татар мәдәнияте башкаласы дип аталуына тукталды. Шулай ук татар мәдәниятенә өлеш керткән шәхесләр турында да сөйләде. Төштән соң ике төрле остаханә эшләде: Райнур ясалма фәһем ярдәмендә видеолар ясарга өйрәтсә, Ләйсән үткәргән кул эшләре остаханәсендә исә милли алкалар ясадылар, нәтиҗәдә, һәр катнашучының истәлеккә үз куллары белән эшләнгән бизәнгечләре булды. Көннең икенче яртысында музыкант, мультиинструменталист Ильяс Фәрхуллин катнашучыларны төрки музыка уен кораллары белән таныштырды. Ә кичке якта Илфат Батаршин аш-су остаханәсендә милли ризыклар әзерләү серләре белән уртаклашты. Бөтен катнашучылар бергәләп өчпочмак һәм «Бармак» атамалы печенье пешерде һәм, үзләре пешергән ризыкларны авыз итәргә, матур табын артына җыелды. Икенче көнне иртән катнашучылар Татар Каргалысы авылына юл тотты. Тарихи авылда татар мәдәнияте эзләре, борынгы йортлар белән таныштылар. Төштән соң Ырынбурның татар урыннары буйлап экскурсия оештырылды. Кич Урал елгасы ярында татар халкының җырлы-биюле милли уеннары белән тәмамланды.