АБДь волонтердарын улуустааҕы форума үрдүк таһымнаахтык буолла! — 8 мая 2026 г. в 21:20:03.517
АБДь волонтердарын улуустааҕы форума үрдүк таһымнаахтык буолла! Ыам ыйын 8 күнүгэр, Тааттатааҕы норуот айымньытын дьиэтэ Анал байыаннай дьайыыга көмөлөһөр волонтердарын хамсааһынын улуустааҕы форумугар ыалдьыттарынан туолбута. Бу суолталаах тэрээһиҥҥэ өрөспүүбүлүкэ үрдүнэн биллэр Саллааттар уонна мотуруостар төрөппүттэрин кэмитиэтин салайааччыта Мария Емельянова, уһун айаннарга үөрүйэх суоппардар, волонтердар Николай Мочкин, Иван Мочкин ыҥырыллан кэлэн, АБДь кыттыылаахтарын дьиэ кэргэттэрин кытта истиҥник кэпсэттилэр. Кинилэр элбэх ыйытыыга хоруйдаан, араас кыһалҕаларга сүбэ-ама биэрэн, дьоҥҥо улахан өйөбүл буоллулар. Форум чэрчитинэн, тыйаатыр аллараа этээһигэр, киириигэ, волонтердар олус интэриэһинэй быыстапкалара тэриллибитэ. Манна байыаннай таҥас арааһа, харысхал, эмтээх от уонна да атын элбэх туһалаах маллар көрдөрүүгэ турдулар. Маны таһынан, Хартыына галереятыгар маастар-кылаастар ыытылыннылар. Киин библиотека үлэһиттэрэ, илиилэрин сылааһынан "биэс харах" сахалыы харысхалы оҥорон, алҕаан туран тиктилэр. Бу харысхал АБДь сылдьар уолаттарбытыгар эрэл, бигэ тирэх буоллун диэн. Форум түмүгэр, АБДь волонтердарын хамсааһына өссө бөҕөргөөн, дьон биир сомоҕо буолан өйөһөрүн уонна өйөбүлүн биллэрдэ.