💥Бүген Октябрьскийның Төрекмән бистәсендә яңа балалар мәйданчыгы ачылды
💥Бүген Октябрьскийның Төрекмән бистәсендә яңа балалар мәйданчыгы ачылды Әлеге матур почмакны якташлары өчен киң күңелле, юмарт эшкуар Валерий Исмәгыйлев төзеткән. Мәйданчыкны тантаналы ачуда шәһәр Советы рәисе Андрей Купавых, хакимият башлыгы урынбасары Константин Герман, урындагы депутат Максим Дементьев, төбәк иҗтимагый үзидарә советы рәисе Наилә Зиннәтова катнашты. Чара күркәм гадәт буенча Коръән сүрәләре уку белән башланды. Кунаклар чыгышында бистә тормышына битараф булмаган, аның киләчәген кайгыртучы меценатка рәхмәт сүзләре яңгырады. Шундый игелекле ул тәрбияләгән өчен әнисе Рәхимә Миңнегали кызына хөрмәт күрсәтелде. Тантананың иң дулкынландыргыч мизгеле — кызыл тасманы кисү. Шул мизгелдә үк мәйданчыкка йөгереп кергән балаларның шат авазы бөтен Төрекмәнне яңгыратты. Мәйданчык үзе дә сокланырлык. Биредә йомшак резина түшәгеч җәелгән, төрле яшьтәге балалар өчен таучыклар, таганнар, карусельләр урнаштырылган. Ата-аналар да канәгать — хәзер сабыйларны читкә, шәһәргә йөртәсе юк, сыйфатлы уен зонасы янәшәдә генә.