🔹Тываның күрүне университединиң ада-чурт төөгүзүнүң кафедразының профессору, төөгү эрт... — 21 августа 2026 г. в 09:56:30.671
🔹Тываның күрүне университединиң ада-чурт төөгүзүнүң кафедразының профессору, төөгү эртемнериниң доктору Зоя Доржу IV делегей чергелиг буддизм шуулганының үезинде журналистер-биле ужурашкан. Форумга көдүрген кол айтырыгларны, кижизидилгеге чүдүлгениң ужур-утказының дугайында, ол ышкаш унивеситет өөредилге ажылынга форумнуң материалдарын канчаар ажыглаарын чугаалаан. Форумнуң киржикчилери шажынны политикажытпазының чидиг айтырыын болгаш, аңаа даянып алгаш, чурттар болгаш националдар аразында чөрүлдээлерниң үнүп келириниң айыылын сайгарып көрген. Бо айтырыг өг-бүледе кижизидилгеден эгелээр ужурлуг. Амгы салгал культура болгаш төөгү дамчыштыр ону билип ап болур. Профессор ырак чурттардан келген аалчыларның форумга кайгап ханмаан сонуургалын база үлешкен. «Олар шупту чүвени билип алыры-биле катап-катап айтырыгларны салганнар. Айтырыглар кайда-даа дөмей. Олар бүгү кижи төрелгетенге салдарлыг айтырыг болган. А бир эвес олар ол айтырыгларны көдүрүп турар болза, оларның сагыш човап турары-дыр, ону шиитпирлээр херек. Чидиг айтырыгларны көдүрери - оларны шиитпирлээриниң база бир аргазы-дыр" - деп, ол чугаалаан. Зоя Доржу форумнуң материалдарын өөредилгеге ажыглаар планнарын база чугаалаан. "Мындыг медээлер студентилерге кезээде дамчыдып турар болза эки. Бистиң студентилеривис бо ажылды хайгаарап турар дээрзинге бүзүрээр мен" - деп, Зоя Доржу түңнээн.