🔹Россия Федерациязының Хөй-ниити палатазының Националдар, шажыннар аразының харылзаала... — 21 августа 2026 г. в 09:47:02.229
🔹Россия Федерациязының Хөй-ниити палатазының Националдар, шажыннар аразының харылзаалары болгаш миграция талазы-биле комиссия даргазы Владимир Зорин IV бүгү-делегейниң буддийжи шуулганынга журналистер-биле ужурашкан. Күрүнениң ниити айтырыгларын шиитпирлээрде буддийжи организацияларның ролюн, Россияда күрүне-шажын харылзааларының үлегерин база националдар болгаш шажыннар аразында эп-найыралды быжыглаарынга форумнуң чугулазын ол демдеглээн. «Сөөлгү чылдарда бүгү чуртта буддийжи организациялар ниити айтырыгларны шиитпирлээринге идепкейлиг киржип турар. Бо ажыл ылаңгыя COVID-19 пандемиязы болгаш тускай шериг операциязын чарлаан үеде күштели берген. Ниити айтырыгларны шиитпирлээринге буддийжи организацияларның үлүг-хуузун бо чугаада демдеглексеп тур мен» - деп, Владимир Зорин чугаалаан. Шупту шажыннар аразының диалогунда чуртта бүрүткеттинген 32 муң шажын организациялары киржип турар деп, ол дыңнаткан. Ындыг болзажок, дөрт үндезин шажыннар, оларның аразында буддизм, кол угланыышкыннарны берип турар. Зоринниң чугаазы-биле алырга, форумнуң шупту аалчылары Россияда күрүнениң шупту адырларының, күрүне эрге-чагыргазының, хамааты болгаш эртем ниитилелдериниң аразында хүн бүрүде харылзаалыг ажылдап турар күрүне-шажын харылзааларының үлегер-чижээн хүндүлеп, сонуургааннар. «Россия Федерациязында Чоннарның чаңгыс деминиң чылы-биле холбаштыр эртип турар хемчеглерни сайгарып көрдүвүс. Бо бүгүге сайгарылганы болгаш чугааны тускай чижектерге даянып чорутканын билир силер. Шажынчы сагылгадан аныяктарның кижизидилгезинге чедир, өг-бүледе хамаарылганың өскерилгенинге чедир. Адалар эвилелдери ажылдап, ТШО зоназында оолдарга ачы-буян чыылдазы дээн ышкаш улуг хемчеглерге идепкей улуг. Буддийжи организацияларның реабилитация хемчеглеринге, балыгланган кижилерни эмнээринге, ооң иштинде психологтуг айтырыгларны шиитпирлээринге киржилге дугайында дыка шыңгыы чугаа болган» - деп, Хөй-ниити палатазының комиссиязының даргазы чугаалаан. Владимир Зорин шажыннар аразында чугааның угланыышкыннарын болгаш айтырыгларын дугайында чугаалап тура, элээн каш айтырыгларга доктааган: болгу дег чөрүлделерни эртежик илередеринге мониторингини хөгжүдери, аныяктарның ажыл-чорудулгазын күштелдирери, төөгү билиглерин сайзырадыры. Сөстерни кичээнгейлиг ажыглаарын, даштыкы чурттардан дылга көөр хөөн чорукка болгаш информастыг халдаашкыннарынга хамаарыштыр бодамчалыг болурун кыйгырган. «Тыва Республикада мындыг улуг хемчээлдиг бир дугаар эрттирип турар кайгамчык болуушкуннуң херечилери бис, деп санаар-дыр мен. Бүгү регионга база Россияга онзагай болуушкун дээрзи билдингир, ооң делегей чергелиг ужур-утказы дыка улуг. Бөдүүнү-биле чугаалаарга, Тыва – Азияның төвү, а Кызыл – буддийжи төп деп, бодун база катап бадыткаан. Бөгүнгү нарын үеде, амыр-тайбыңның, националдар база шажын-чүдүлгелер аразында диалог бодунуң ужур-утказын база катап бадыткап, аңаа күштүг болгаш кол деткимче болуп турар» - деп, Владимир Зорин демдеглээн.