🔹 Тываның социал хандырылга органнары хөй ажы-төлдүг өг-бүлелерден школачы идик-хеп са... — 28 августа 2026 г. в 02:31:17.571
🔹 Тываның социал хандырылга органнары хөй ажы-төлдүг өг-бүлелерден школачы идик-хеп садып алырынга чылдың пособиезинче билдириишкиннерни октябрь 31-ге чедир хүлээр. Август 27-ге чедир 1025 өг-бүле бир уругга-ла дээш 5000 рубль акша материалдыг дузаламчыны алган. Өөредилге чылының бүдүүзүнде, хөй ажы-төлдүг өг-бүлелерниң саң-хөө чүъгүн эвээжедири-биле, күрүне деткимчезиниң бо хемчээн республиканың Баштыңы Владислав Ховалыгның даалгазы-биле доктааткан. 18 хар четпээн үш азы оон хөй ажы-төлдүг өг-бүлелерден иелер (уруг азырап алган, азыранды ажы-төлдүг, опекун, ажаап-тежээп турар) база иези чок апарган, ис чок читкен, азы ада-ие эргезин казыткан таварылгада чааскаан ажы-төл азырап чоруур адалар пособиени алыр эргелиг дээрзин күш-ажыл яамызы сагындырып турар. Өг-бүлениң кижи санынга хамаарыштыр орулгазы регионда ажылдаар назылыг чурттакчы чоннуң амыдырап-чурттаарының кудуку хемчээлиниң түңүнден 1,25 катап ашпас ужурлуг. Өг-бүле Тывада чурттап турар, ооң шупту кежигүннери Россияның хамаатылары болур ужурлуг. 2026 чылда Тыва Республикада ажылдаар назылыг чурттакчы чоннуң амыдырап-чурттаарының кудуку хемчээли 20850 рубльга дең, ынчангаш ук пособиени алыр өг-бүлениң кижи санынга хамаарыштыр ортумак орулгазы 26062,5 рубльден (20850 × 1,25) ашпас болур. Пособиени алыр дугайында билдириишкинни чурттап турар черинде социал хандырылга албанынче — муниципалдыг район чагыргаларының күш-ажыл болгаш социал хөгжүлде эргелелдеринче, азы Кызыл хоорай мэриязының социал политика департаментизинче боду барып киирер. Тываның Күш-ажыл болгаш социал политика яамызының «Макс» национал мессенджерде чат-бот таварыштыр хөй ажы-төлдүг өг-бүлелерге деткимче хемчеглериниң дугайында тодаргай медээни көрүп болур. Кирер айтыы: max.ru/mintrudrtbot. Бо чылын республика бюджединде пособие төлевирин хандырарынче 61 млн ажыг рубльди аңгылаан.