🔹«Билиг» российжи ниитилел Россия Федерациязының Президентизиниң Сибирь федералдыг окр... — 27 августа 2026 г. в 10:43:44.641
🔹«Билиг» российжи ниитилел Россия Федерациязының Президентизиниң Сибирь федералдыг округда бүрүн эргелиг төлээзиниң аппарадының база Тываның Чазааның деткиишкини-биле, тускай шериг операциязының хоочуннарынга деткимче көргүзүп турар республиканың социал албан черлериниң болгаш организацияларның ажылдакчыларынга «Билиг.Күрүне» төлевилелдиң семинарын организастаан. Россияның Президентизи Владимир Путинниң даалгазы езугаар, «Билиг» ниитилели тускай чырыдыышкын-өөредилге программазын ажылдап кылган. 2025 чылда Россияның элээн каш субъектилеринге ол программаны шенеп эрттирген. Шериг албанныглар болгаш оларның өг-бүлелери-биле ажылдап турар 2 муң ажыг ажылдакчылар өөредилгени эрткен. Программаны дооскан киржикчилерге салган айтырыгларга харыылары өөредилге чорудуу үре-түңнелдиг болганын бадыткаан. Өөредилгениң бирги хүнү Кызылга эрткен болза, Чадаананың 2 дугаар школазында семинарның ийиги хүнү болуп турар. Специалистер тускай шериг операциязының хоочуннары болгаш оларның өг-бүлелери-биле ажылдаарының арга-дуржулгазын бедидер, ол ышкаш ажылынга сонуургалды чидирер чорукту болдурбас дээш, демниг хөделириниң чедимчелиг арга-хевирлерин үлешкен. Киржикчилер дайынчыларның психологтуг онзагайын, нарын байдалының хевирлерин шинчилеп, ажылынга шылаашкынны канчаар ажып эртерин шиңгээдирлер. Тываның Чазааның Даргазының оралакчызы Орлан Сарыглар республиканың социал ажылдакчыларынга семинарның практиктиг ужур-дузазын демдеглеп, тускай шериг операциязының киржикчилеринге болгаш оларның өг-бүлелеринге регионда кандыг деткимче хемчеглери барын база катап сагындырган. «Тывада шериг албанныгларның, балыгланган болгаш мөчээн дайынчыларның өг-бүле кежигүннеринге, ажы-төлдүг өг-бүлелеринге уруглар сады дээш ада-ие дадывырындан хостаар, школачыларга чемненир база аай-дедир чоруунга компенсация, ол ышкаш ургларның кадыкшылга лагерьлеринге халас дыштанырынга дээш, чаңгыс катап бээр төлевирлер кирген комплекстиг система ажылдап турар. Тускай шериг операциязының киржикчилери болгаш оларның өг-бүле кежигүннери эмчи дузазын, санаторлуг-курорт эмнээшкинин, психологтуг консультацияны ээлчег чокка алыр. «Билиг» ниитилелиниң программазы харылзааның чаңгыс аайлаан чурумун ажылдап кылырынга, профессионал арга-дуржулганы нептередиринге, ажылдың чаа аргаларын шиңгээдиринге база тускай шериг операциязының хоочуннарынга болгаш оларның өг-бүлелеринге деткимчениң чаңгыс аай системазын тургузарынга дузалаар» - деп, дарганың оралакчызы семинарның ажыдыышкынында чугаалаан.