🔹 Тываның Баштыңы республиканың кожууннарында автозаправка станцияларының ээлери-биле ... — 3 сентября 2026 г. в 08:20:34.032
🔹 Тываның Баштыңы республиканың кожууннарында автозаправка станцияларының ээлери-биле ужурашкан. Ужуражылга үезинде регионнуң кывар-чаар чүүл рыногунда амгы байдалды сайгарып, бензин өртээн турумчудуп, ону үзүктел чок хандырарының талазы-биле санал-оналдарны солушкан. Владислав Ховалыг сайгарлыкчыларга Энергетика яамызы-биле удур-дедир боттандырар хүлээлгелерин айыткан кады ажылдажылга дугуржулгаларын чарарын саналдаан. Тываның Энергетика болгаш чуртталга-коммунал ажыл-агый яамызының база монополияга удур федералдыг албанның Тывада эргелелиниң төлээлери ужуражылгага киришкен. Энергетика сайыды Эдуард Куулар бүгү чуртта кывар-чаар чүүлдер хандырылгазы кызыгаарлыг хевээр дээрзин дыңнаткан. Россияның нефть болбаазырадыр заводтарынче украин дроннарның халдаашкыннары-биле кызыгаарлаашкыннар холбаалыг. Россияның Чазаа бүгү чуртта кывар-чаар чүүл хандырылгазын экижидер дээш, хүннүң-не улуг күжениишкиннерни үндүрүп турар. Федералдыг эрге-чагыргалар Тверь, Тамбов, Новосибирск, Нижегород областар, Алтай край база Бурятия, Хакасия, Саха (Якутия), Тыва республикалар дээн ышкаш регионнарның кывар-чаар чүүл хандырылгазын онза контрольда алган. Республиканың кывар-чаар чүүл-биле хандырылга айтырыы федералдыг контрольда дээрзин Владислав Ховалыг демдеглээн. Чазак Даргазының оралакчызы Александр Новак баштаан федералдыг ажылчын бөлүк хүннүң-не мониторингини чорудуп турар. Регионда Чазак Даргазының оралакчызы Артыш Кыргыс баштаан ажылчын бөлүк база тургустунган. Федералдыг деткимче хемчеглериниң ачызында республикага кывар-чаар чүүлге херек хемчээлдиң хандырылгазын арттырган. Владислав Ховалыг «Роснефть», «Газпром нефть» база «ЛУКОЙЛ» нефть болгаш газ улуг компанияларының удуртулгазы-биле кывар-чаар чүүл хандырылгазынга хамаарыштыр доктаамал харылзааны тудуп турарын демдеглээн. Амгы үеде республика девискээринче улаштыр хуваар бензинниң улуг партиязын сөөртүп эккээрин дугуржуп турарлар. Республика баштыңы аңаа хамаарыштыр хуу заправкалар төлээлери-биле таарымчалыг өртек политиказының дугайында дугуржулгаларны чарарын саналдаан. Боттарының арга-шинээн санап, моон-даа соңгаар кады ажылдаарынга хамаарыштыр санал-оналдарны киирерин сайгарлыкчыларга сүмелээн. Бии-Хем, Чөөн-Хемчик, Таңды кожууннарда автозаправка төлээлери кады ажылдаар күзелин илеретсе-даа, сайгарлыкчылар сөөлгү үеде кывар-чаар чүүл садып алырынга бергедээшкиннеринге таваржып турарын дыңнаткан. Кол бергедээшкин – мөөңнеп садар хандырыкчылардан садып алыр өртектерниң аарында. Ужуражылганың түңнелинде, ийи тала республиканың кывар-чаар чүүл рыногунда өртек политиказын турумчударынга база төнчү хереглекчилерге бензинниң өртээнге салдар чедирер ужурлуг кады ажылдажылгага беленин илереткен. Энергетика яамызы автозаправка станцияларының ээлери-биле кады ажылдаарының арга-хевирлерин болгаш дугуржулганың төлевилелин ажылдап кылыр даалганы алган. «Тус черниң кывар-чаар чүүл кудар станциялар ээлери чаңгыс чер чурттугларының мурнунга харыысалгазын билип, кады ажылдажылгага белен болганы эки-дир. Россияның чазаанга болгаш нефть компанияларының удуртулгазынга Тываны деткип турары дээш четтиргеним илереттим. Айтырыгны көрүп, ону хүннүң-не шиитпирлеп, чурттакчыларның сонуургалдарын камгалаары-биле бүгү-ле аргаларны кылып турар бис. Кылыр чүүлдер хөй, ынчангаш ажылдар ам-даа уламчылаар. Чуртта амгы байдалды база билип көөрүн дилеп тур мен» - деп, Владислав Ховалыг заправка ээлери-биле ужуражылга соонда демдеглээн.