🔹Август 31-де Киргизияда эгелээн VI -гы бүгү-делегейниң көшкүн чоннарының оюннарында 1... — 2 сентября 2026 г. в 02:56:07.415
🔹Август 31-де Киргизияда эгелээн VI -гы бүгү-делегейниң көшкүн чоннарының оюннарында 100 ажыг чурттардан спортчулар киржип турар. Россияның чыынды командазынче Тыва Республикадан 27 спортчу кирген. Бо улуг хемчегниң хүндүлүг аалчызы кылдыр чалаттырган Россияның Президентизи Владимир Путин спортчуларга байырны чедирген. Тываны маргылдааларга 27 спортчулар — мөгелер, адыгжылар, чылгычылар төлээлээрин, а уран чүүл ажылдакчылары тыва культураның бот-онзагайын көргүзерин Тываның Баштыңы Владислав Ховалыг бодунуң блогунда дыңнаткан. «Мындыг улуг хемчээлдиг хемчегге киржилге бистиң делегациявыска үнелиг арга-дуржулганы бээр дээрзинге бүзүрээр мен, ол Тывага спорттуң национал хевирлерин болгаш культураның моон-даа соңгаар хөгжүлдезинге улуг идиглиг. Чедиишкиннерни, быжыг тура-сорукту, чайынналчак тиилелгелерни күзедим!» - деп, Владислав Ховалыг бодунуң блогунда бижээн. Улуг маргылдааларга белеткел үезинде, Тывадан Россияның чыынды командазының кежигүннери материалдыг деткимче көргүзер дилегни республика Баштыңынче кииргенин сагындыраал. Владислав Ховалыг чарыш аъттарын аай-дедир сөөртүрүнге дээш оон-даа өске уруг чарыгдалдарга спортчуларны деткиир шиитпирни үндүрген. Төрээн республиказының удуртукчузунуң деткимчезиниң ачызында, Россияның күрүне тугун байырлыг ажыдыышкын үезинде көдүрерге төлептиг болган сумога делегей чергелиг спорт мастери, Россияның чыынды хүреш командазының кежигүнү Айдың Монгуш баштаан шыырак мөгелер амгы үеде улуг оюннарда киржип турар. Байырлыг ажыдыышкын үезинде Россияның Президентизи Владимир Путин Россияның командазынга трибунадан байыр чедиргени кайгамчык болгаш онзагай болуушкун болган. Дүүн хүрештиң национал хевирлеринге маргылдааларның бирги түңнелдери билдинген. Тываның Арзылаң мөгези Мөңге-Эртине Куулар моол хүрешке (моол бөх) Моолдуң спортчузу Анар Дорж-биле тудушкаш, мөңгүн медальды чаалап алган. Тываның мөгези төнчү салыгга чедир шупту удурланыкчыларын октааш, күчү-күштүүн, арга-дуржулгалыын, бедик хей-аъдын көргүскен.