Василий Аринкин сырдык аатыгар «СаДуоБа» аһаҕас турнира ыытылынна
Василий Аринкин сырдык аатыгар «СаДуоБа» аһаҕас турнира ыытылынна ♟️ Алтынньы 17 күнүгэр Нөөрүктээйи нэһилиэгэр «Айылгы» норуот айымньытын киинигэр Василий Егорович Аринкин сырдык аатыгар «СаДуоБа» аһаҕас турнира ыытылынна. Успуорт түһүлгэтин Василий Егорович кэргэнэ Анна Ильинична оҕолорун, чугас аймахтарын, доҕотторун кытта тэрийдилэр. ♟ Элбэх оҕолоох дьиэ кэргэн аҕа баһылыга, үлэ бэтэрээнэ Василий Аринкин 1961 с. бэс ыйын 7 күнүгэр Бүтэйдээх нэһилиэгэр күн сирин көрбүтэ. Бүтэйдээх орто оскуолатыгар үөрэнэр кэмигэр волейболу, тенниһи уонна дуобаты сөбүлээн дьарык оҥосторо. 1980 с. оскуолатын бүтэрэн Байкалов аатынан сопхуоска оробуочайынан үлэлээбитэ. 1981 с. кэргэнин Анна Ильиничнаны көрсөн ыал буолбуттара. 1986 с. Нөөрүктээйи нэһилиэгэр көһөн кэлэн олохсуйбуттара. Үс оҕолонон, эһээ, эбээ үрдүк аатын сүкпүттэрэ. ♟ Василий Егорович Павловскай орто оскуолатыгар бочуоттаах сынньалаҥҥа тахсыар диэри харабылынан үтүө суобастаахтык үлэлээбитэ. Үлэ, дьиэ-уот түбүгүн быыһыгар дуобакка, саахымакка нэһилиэккэ, улууска, аһаҕас да күрэстэргэ кыттан дойдутун чиэһин көмүскүүрэ. ♟️ Анна Ильинична, Василий Егорович оҕолоро, сиэннэрэ дойдуларыгар араас эйгэҕэ таһаарыылаахтык үлэлии-хамсыы сылдьаллар. Ыччаты үтүө холобурунан иитиигэ, дойдуга бэриниилээх буолууга, араас быһыыга-майгыга туора турбакка эппиэтинэһи сүгүүгэ чаҕылхай холобурунан, Аринкиннар киэн туттар уоллара, анал байыаннай дьайыы кыттыылааҕа «За упрепление боевого духа», «За отвагу», «За храбрость», «За мужество» бэлиэ хаһаайына Валерий Васильевич Аринкин буолар. ♟ Дьиэ кэргэн аҕатын, киэн туттар спортсмен аатын сүгэр күрэхтэһиигэ Мэҥэ Хаҥаластан, Хаҥаластан, Уус Алдантан саахымат, дуобат, баарыс араас таһымнаах маастардара, чөмпүйүөннэрэ, көҕүлээччилэрэ уонна Василий Аринкин чугас доҕотторо-атастара, билэр дьоно чиэстии, ытыктыы кэлбиттэр. Бары кыттааччылары, ыалдьыттары алгыстаах алаадьынан, үтүө тылларын Василий Егорович аймахтара, нэһилиэк олохтоохторо үөрэ-көтө көрүстүлэр. Сиһилии уонна элбэх хаартысканы БУ СИГЭНЭН киирэн билсиҥ⬅️ @gazetaerkeii @ulusmedia