Управление культуры и духовного развития МР «Хангаласский улус»
Новости · 26 июня 2026 г.
🌿Бэс ыйын 21 күнүгэр Орто Дойду маанылаах туонатыгар Эркээни Ыһыаҕа 5000 тахса ыалдьыт... — 26 июня 2026 г. в 15:00:28.599
🌿Бэс ыйын 21 күнүгэр Орто Дойду маанылаах туонатыгар Эркээни Ыһыаҕа 5000 тахса ыалдьыттары үөрэ көрүстэ. Быйылгы уйгулаах Ыһыахпыт Арассыыйа үрдүнэн норуоттар доҕордоһууларын, Сахабыт сиригэр Култуура, Улууспутугар сомоҕолоһуу уонна айан -тутан түмсүүлээх буолуу сылыгар ананна. Ону тэҥэ чулуу биир дойдулаахтарбыт Маһары Баһыакап Арассыыйа Ыраахтааҕытыгар бастакы депутацията 350 сылын, Илья Максимович Шадрин 265 сааһын, Семен Петрович Барашков 150 сааһын, Адам Васильевич Скрябин 130 сааһын уонна Павел Николаевич Харитонов – Ойуку 85 сааһын туолар үбүлүөйдээх күнүн бэлиэтээтибит. Эркээни Ыһыаҕа быйыл үһүс төгүлүн Күнү көрсүүттэн саҕаламмыта, сарсыныгар үгэс курдук Ыһыах сүрүн Алгыһа, нэһилиэктэр сэлэлии хаамыылара, Адам Васильевич Скрябин матыыбынан, Алампа тылыгар «Саха ырыата» холбоһуктаах хор толоруутугар ылламмыта. Бу тэрээһиҥҥэ сүрүн режиссерунан биир дойдулаахпыт Айдыс Черноградскай үлэлээтэ, барыта 200 тахса киһи кыттыыны ылла. Эбиэт кэннэ түһүлгэлэринэн араас тэрээһиннэр ыытылыннылар: түрбэ быыстапката, фольклор уонна спорт күрэстэрэ, сахалыы таҥас, оҕо саас түһүлгэтэ, хорчуоппа уонна быйыл сонун күрэҕинэн нэһилиэк култуура кииннэрин икки ардыгар фотозона күрэҕэ дьон-сэргэ сэҥээриитин ылла. Ыһыах киэһэтин улууспут талба талааннара, уус-уран самодеятельность үҥкүү-ырыа кэнсиэринэн киэргэттилэр. Манна Хаҥаластан Туой Хайа кыайыылаахтара, араас өрөспүүбүлүкэ уонна тас дойду күрэхтэрин кыайыылаахтара мустан “Кэрэни кэрэхсээн ыллыыбыт-туойабыт!” чаҕылхай түгэни бэлэхтээтилэр. Ыһыахпыт саха эстрадатын сулустарын кыттыылаах “Этносфера” этно бырагараамманнан түмүктэннэ. Түгэнинэн туһанан «Эркээни Ыһыаҕа – 2026»кыттыылаахтарыгар, спонсордарга уонна тэрийээччилэргэ барҕа махталбытын тиэрдэбит! Эһиилги Ыһыахха көрсүөххэ диэри!🌿 #КультураХаналас #ЫсыахЭркээни #годКультуры