Тааттаҕа үөрэх эйгэтин үлэһиттэрин балаҕан ыйынааҕы мунньаҕа Д.К. Сивцев - Суорун Омолл...
Тааттаҕа үөрэх эйгэтин үлэһиттэрин балаҕан ыйынааҕы мунньаҕа Д.К. Сивцев - Суорун Омоллоон 120 сыллаах үбүлүөйүн кытта сомоҕолосто! Балаҕан ыйын 14 күнүгэр Таатта улууһугар үөрэх эйгэтин үлэһиттэрин балаҕан ыйынааҕы мунньаҕа үрдүк таһымнаахтык аһылынна. Бу ааспыт үөрэх сылын түмүктүүр уонна саҥа үүммүт үөрэх сылыгар инники соруктары торумнуур тэрээһин Саха саарына Дмитрий Кононович Сивцев — Суорун Омоллоон төрөөбүтэ 120 сыллаах үбүлүөйдээх бэлиэ күнүн кытта сөп түбэһэн, биир улахан дьаһал быһыытынан ыытылынна. Тэрээһин Арассыыйаҕа Норуоттар сомоҕолоһууларын сылыгар, Саха Өрөспүүбүлүкэтигэр Култуура сылыгар уонна Таатта улууһугар Айар ситим сылыгар ананан, өссө дириҥ ис хоһооннонно. Мунньах Хадаайы музейыгар үөрүүлээхтик аһылынна. Дмитрий Кононович бэйэтэ туттарбыт түмэлигэр үөрэх үлэһиттэрэ мустан, Суорун Омоллоон пааматынньыгар сибэкки дьөрбөтүн уурдулар. Күн устата А.Е. Мординов аатынан Таатта лицейин базатыгар уонна А.Е. Турнин аатынан Спорт уораҕайыгар араас хайысхалаах секциялар, инновационнай площадкалар үлэлээтилэр. Педагогтар, учуонайдар уонна уопсастыбаннас саха фольклорун, төрүт сиэри-туому үөрэтии, сахалыы сурук-бичик сайдыытын, Суорун Омоллоон прозатын, драматургиятын, тыйаатыр уонна опера эйгэтин кытта музей педагогикатын дьүөрэлэһиннэрии боппуруостарын дириҥник ырыттылар. Саҥа үөрэх сылынан, улуу суруйааччыбыт үбүлүөйүнэн, Таатта педагогтара! Айар ситиммит өссө күүһүрдүн, ситиһии өрүү сиэтистин! ✨