Кыһыл көмүс таптал уостубат күүһэ. — 28 августа 2026 г. в 00:25:00.302
Кыһыл көмүс таптал уостубат күүһэ. Кыһыл көмүс сыбаайба – бу ытык суолталаах, дьиэ кэргэн сыһыанын сыаналыыр, уһуннук бииргэ олорбут ытык ыаллары кыһыл көмүс сыбаайбаларынан чиэстиир дьоллоох, дьоро күн буолар. Сунтаар улууһугар атырдьах ыйын 21 күнүгэр улууспут ытыктанар, киэн туттар икки ыалбыт 50 сыллаах үбүлүөйдэрин үөрүүлээх күнэ буолла. Клара Владимировна уонна Валерий Семенович Ивановтар иккиэн математика учуутала идэлээх, успуорду өрө тутар, 4 оҕолоох, 12 сиэннээх ытык-мааны ыал буолаллар. Клара Владимировна 47 сыл тухары оскуолаҕа бэриниилээхтик үлэлээбит, хас да көлүөнэ ыччаты олох киэҥ суолугар таһаарбыт учуутал, «Учууталлар учууталлара» үрдүк аат хаһаайына, Саха Өрөспүүбүлүкэтин үөрэҕириитин туйгуна, «Переселенцы Туой-Хая» уопсастыбаннай тэрилтэ салайааччыта. Валерий Семенович 23 сыл волейбол федерациятын салайбыт, 37 сыл статистика отделын салайааччытынан бэриниилээхтик үлэлээбит улууспут киэн туттар олохтооҕо, РФ Үлэтин бэтэрээнэ, «Сунтаар улууһун сайдыытыгар кылаатын иһин» бэлиэ хаһаайына. Иккис ыалбыт — оруобуна 50 сыл анараа өттүгэр бу күн сүрэхтэрин, олохторун холбообут Мария Прокопьевна уонна Иван Семенович Чагдинскайдар. Кинилэр улууспут эмиэ биир киэн туттар, култуура сайдыытыгар холобур буолар ыала, 3 оҕо амарах ийэлээх аҕалара, 11 сиэн тапталлаах эбээлээх эһээлэрэ буолаллар. Мария Прокопьевна 1973 сылтан 43 сыл устата эҥкилэ суох үлэлээбит, РФ доруобуйа харыстабылын туйгуна, дьон махтанар «үрүҥ халааттаах аанньала», «Көҕүөр» хор кыттыылааҕа. Иван Семенович 1977 сылтан олоҕун устата хаһыат корреспонденынан, редактор солбуйааччытынан бэриниилээхтик үлэлээбит улууспут Бочуоттаах олохтооҕо, «Саха Өрөспүүбүлүкэтин култууратын туйгуна», «Саха Өрөспүүбүлүкэтин үтүөлээх суруналыыһа», «Саха Өрөспүүбүлүкэтин бэчээтин туйгуна» үрдүк ааттар хаһаайыннара. Бу курдук улууспут уопсастыбаннай, култуурунай уонна экэнэмичэскэй олоҕор сүүнэ кылааттарын киллэрбит ытык-мааны ыалларбытын нэһилиэк баһылыга Эдуард Егорович Ил Дархан аатыттан «Дьиэ кэргэн килбиэнэ» анал бэлиэтин туттарда, ону тэҥэ дьокутааттар Сэбиэттэрин бэрэссэдээтэлэ Роман Владимирович истиҥ эҕэрдэлэрин анаатылар уонна өйдөбүнньүк бэлэхтэри ууннулар. Күндү үбүлүөйдээх ытык дьоммутугар, өссө да оҕолоргут, сиэннэргит уҕараабат истиҥ тапталларыгар бүөбэйдэнэн, өссө да уһуннук дьоллоохтук олороргутугар баҕарабыт!