Порядок чтений: Суббота, 25 апреля 2026 г. (12 апреля ст.ст.) — 24 апреля 2026 г. в 18:04:12.759
Порядок чтений: Суббота, 25 апреля 2026 г. (12 апреля ст.ст.) Седмица 2-я по Пасхе Богослужебные указания для священно- и церковнослужителей Евангельские и Апостольские чтения На литургии Апостол Деян.5:21 Слышавше же внидоша по утренице в церковь и учаху. Пришед же архиерей и иже с ним, созваша собор и вся старцы от сынов Израилевых и послаша во узилище, привести их. Деян.5:22 Слуги же шедше не обретоша их в темнице, возвращшежеся возвестиша, Деян.5:23 глаголюще, яко темницу убо обретохом заключену со всяким утверждением и блюстители стоящыя пред дверьми: отверзше же, внутрь ни единаго обретохом. Деян.5:24 Якоже слышаша словеса сия архиерей же и воевода церковный и первосвященницы, недоумевахуся о них, что убо будет сие. Деян.5:25 Пришед же некто возвести им, глаголя, яко се, мужие, ихже всадисте в темницу, суть в церкви стояще и учаще люди. Деян.5:26 Тогда шед воевода со слугами, приведе их не с нуждею, бояхуся бо людий, да не камением побиют их: Деян.5:27 приведше же их, поставиша на сонмищи, и вопроси их архиерей, глаголя: Деян.5:28 не запрещением ли запретихом вам не учити о имени сем? И се, исполнисте Иерусалим учением вашим и хощете навести на ны кровь Человека Сего. Деян.5:29 Отвещав же Петр и Апостоли реша: повиноватися подобает Богови паче, нежели человеком: Деян.5:30 Бог отец наших воздвиже Иисуса, Егоже вы убисте, повесивше на древе: Деян.5:31 Сего Бог Началника и Спаса возвыси десницею Своею, дати покаяние Израилеви и оставление грехов: Деян.5:32 и мы есмы Того свидетелие глагол сих, и Дух Святый, Егоже даде Бог повинующымся Ему. Деян.5:33 Они же слышавше распыхахуся и совещаша убити их. Евангелие Ин.6:14 Человецы же видевше знамение, еже сотвори Иисус, глаголаху, яко Сей есть воистинну Пророк Грядый в мир. Ин.6:15 Иисус убо разумев, яко хотят приити, да восхитят Его и сотворят Его царя, отиде паки в гору един. Ин.6:16 Яко позде бысть, снидоша ученицы Его на море, Ин.6:17 и влезоша в корабль, и идяху на он пол моря в Капернаум. И тма абие бысть, и не (у) бе пришел к ним Иисус. Ин.6:18 Море же, ветру велию дыхающу, воздвизашеся. Ин.6:19 Гребше же яко стадий двадесять пять или тридесять, узреша Иисуса ходяща по морю и близ корабля бывша, и убояшася. Ин.6:20 Он же глагола им: Аз есмь, не бойтеся. Ин.6:21 Хотяху убо прияти Его в корабль: и абие корабль бысть на земли, в нюже идяху. Ин.6:22 Во утрий (же) народ, иже стояше об он пол моря, видев, яко корабля иного не бе ту, токмо един той, в оньже внидоша ученицы Его, и яко не вниде со ученики Своими Иисус в корабль, но едини ученицы Его идоша: Ин.6:23 и ини приидоша корабли от Тивериады близ места, идеже ядоша хлебы, хвалу воздавше Господеви: Ин.6:24 егда же видеша народи, яко Иисуса не бысть ту, ни ученик Его, влезоша сами в корабли и приидоша в Капернаум, ищуще Иисуса, Ин.6:25 и обретше Его об он пол моря, реша Ему: Равви, когда зде бысть? Ин.6:26 Отвеща им Иисус и рече: аминь, аминь глаголю вам, ищете Мене, не яко видесте знамение, но яко яли есте хлебы и насытистеся: Ин.6:27 делайте не брашно гиблющее, но брашно пребывающее в живот вечный, еже Сын Человеческий вам даст: Сего бо Отец знамена Бог.