⛏️🪨Бэрт Ууһун нэһилиэгэр төрүт ньыманан тимири уһаарыы ыытылла турар🔥 — 20 июня 2026 г. в 10:13:57.668
⛏️🪨Бэрт Ууһун нэһилиэгэр төрүт ньыманан тимири уһаарыы ыытылла турар🔥 Бу тэрээһин Сыырдаах бөһүөлэгэ төрүттэммитэ 80, “Победа” холкуос бэрэссэдээтэлэ Петр Николаевич Данилов төрөөбүтэ 110 сылыгар анаммыт икки күннээх үбүлүөйдээх ыһыах иһинэн тэрилиннэ. Улууска тимири уһаарыыны аан бастаан 2014 сыллаахха Россия норуотун маастара Роман Готовцев, билигин биһиги кэккэбитигэр суох Уус Алдан норуотун маастара Анатолий Ховров уонна Намтан тимири уһаарааччы Василий Герасимов уонна норуот маастара Герман Бурцев салайан, тэрийэн ыыппыттар. Бүгүҥҥү тэрээһин туһунан тимир ууһа Илларион Попов билиһиннэрдэ: - Нэһилиэкпит баһылыга Илья Ильин нэһилиэкпитигэр идэтийбит тимир уустара бааллар, бары үлэлии-хамсыы олоролло уонна республикаҕа аан бастаан тимир уһаарыы биһиги улууспутугар ыытыллыбытынан, бу төрүт ньымабытын киэҥник тарҕатыахха, дьоммутугар-сэргэбитигэр билиһиннэриэххэ, ыччакка тиэрдиэххэ диэн тыл көтөҕөн, ыһыах бастакы күнүгэр Туолайга тимири уһааран эрэбит. Манна хас да сыллааҕыта Алдан өрүс кытылыттан хомуйбут таастарбытын бэлэмнээн аҕаллыбыт. Барыта олохтоох 10 уолаттар, олортон аҥаарбыт 30-чалаах эдэр дьон: Афанасий Шепелев, Александр Катакинов, Иван Охлопков, Анатолий Иванов, Илья Портнягин, Семен Охлопков-1, Семен Охлопков-2, Гаврил Бурцев, Александр Шепелев, Егор Колодезников, Спиридон Попов, Дмитрий Попов-1, Дмитрий Попов-2, Дмитрий Петров, Владимир Петухов, Иван Ефимов, Леонид Давыдов кытта сылдьаллар. Кинилэри сэргэ Бүлүү улууһун норуотун маастара Николай Михайлович Шамаев уус бүлүү тааһын илдьэ кэллэ. Икки оһоҕунан бары сиэри-туому тутуһан, сүөһү өлөрөн, хаан таһааран төрүт ньыманан тимир уһаарыыта буола турар. Хомуйбут тааспыт 50 киилэ кэриҥэ, онтон быһа холоон 18-20 кг болгуону ылары былаанныыбыт. Онон дьоммут-сэргэбит, ыччат, олохтоохтор, ыалдьыттар кэлэн көрүҥ, сэргээҥ. ✍️Екатерина Захарова 📸 Нюргуйана Хорунова 📲Мах-каналбытыгар сурут ⬇️ https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU 🌐мюрюгазета.рф ✅ @uamurusahargata @ulusmedia