Арассыыйаҕа Норуоттар сомоҕолоһууларын, Саха Сиригэр Култуура, Уус Алдан улууһугар Түмс...
Арассыыйаҕа Норуоттар сомоҕолоһууларын, Саха Сиригэр Култуура, Уус Алдан улууһугар Түмсүү уонна бииргэ үлэлээһин сылларыгар анаммыт “КЭХТИБЭТ ТАЛААННАР” нэһилиэктэр бэтэрээннэрин Сэбиэттэрин икки ардыларыгар ыытыллар уус-уран самодеятельность бэстибээл бүгүн, алтынньы 8 күнүгэр, Майаҕас бөһүөлэгэр Байаҕантай, Бэрт-Ууһун, Хоро нэһилиэктэрин бэтэрээннэрин кэнсиэртэрин көрүүттэн саҕаланна. Бэстибээл үөрүүлээх аһыллыытынан эҕэрдэ тылын улуустааҕы бэтэрээннэр Сэбиэттэрин бэрэссэдээтэлэ И.И.Колодезников кыттааччыларга ситиһиини баҕаран туран тиэртэ. Хоро нэһилиэгин дьаһалтатын, Майаҕастааҕы “Түмсүү” норуот айымньытын дьиэтин аатыттан Байаҕантай, Бэрт-Ууһун нэһилиэктэригэр эгэрдэ суруктар, сэмэй бэлэхтэр туттарылыннылар. Бэстибээл ыытыллар сыала-соруга - аҕам саастаах көлүөнэ дьоммутугар болҕомто ууруу, кинилэр сынньалаҥнарын тэрийии уонна эдэр көлүөнэ ыччакка үтүө холобуру көрдөрүү буолар. Бэстибээлгэ нэһилиэккэ олорор, үлэлиир 60-нарын туолбут бэтэрээннэр кыттыыны ылаллар, 3 бөлөҕүнэн ыытыллар. Бэстибээл түмүгэ нэһилиэктэр икки ардыларыгар ыытыллар бэтэрээннэр Сэбиэттэрин көрүү уопсай түмүгэр ааҕыллар. Бастыҥ нүөмэрдэргэ дипломаннар, лауреаттар үрдүк ааттара иҥэриллэллэр. Бүгүҥҥү көрүүгэ лауреаттарынан буоллулар: Биирдиилээн толорууга (соло) Константин Иванов (Майаҕас), Бөлөҕүнэн үҥкүүгэ Танда, Майаҕас үңкүү бөлөхтөрө, Уус-уран ааҕыыга Тандаттан Марфа Ноговицына, Хороттон Афанасий Бурцев, Квартетынан толорууга Сыырдаахтар, Ансамбылынан толорууга Сыырдаах, Майаҕас ансамбыллара. Дипломаннарынан буоллулар: Мария Егорова (Танда), Казахскай үңкүү (Сыырдаах), Уус-уран ааҕыыга Максим Портнягин (Сыырдаах), Тандаттан трио толоруута, “Социальнай үлэһит” сыанка (Майаҕас), “Уостубат кыым” ансамбыл (Танда). Уус-уран самодеятельность бэстибээлин көрүүгэ толоруу маастарыстыбата, көстүүм уонна маассабас сыаналанна. Уопсай көрүү түмүгүнэн Байаҕантай нэһилиэгэ 4,4 балл, Хоро нэһилиэгэ 4,3 балл, Бэрт-Ууһун нэһилиэгэ 4,2 баалы ылары ситистилэр. Дьүүллүүр сүбэҕэ үлэлээтилэр Валентина Варламова, “Тойон Мүрү” култуура дыбарыаһын специалиһа, Марфа Алексеева, “Олоҥхо дьиэтэ” этнокултуурунай киин специалиһа. Кэлэр көрүү алтынньы 14 күнүгэр Уһун-Күөл бөһүөлэгэр буолуоҕа. Манна Өнөр, 2-с Лөгөй, Баатаҕай, 1-кы Өспөх нэһилиэктэрэ кыттыыны ылыахтара. Анна Лугинова, улуустааҕы культура управлениетын кылаабынай специалиһа, дьүүллүүр сүбэ бэрэссэдээтэлэ. Алтынньы 8 күнэ, 2026 сыл, Майаҕас бөһүөлэгэ.