Алтынньы 20 күнүгэр “КЭХТИБЭТ ТАЛААННАР” нэһилиэктэр бэтэрээннэрин Сэбиэттэрин икки ард...
Алтынньы 20 күнүгэр “КЭХТИБЭТ ТАЛААННАР” нэһилиэктэр бэтэрээннэрин Сэбиэттэрин икки ардыларыгар ыытыллар уус-уран самодеятельность бэстибээл Бээрийэ бөһүөлэгэр буолла. Манна 3-с бөлөххө кыттар Түүлээх, 2-с Байаҕантай уонна Бээрийэ нэһилиэктэрэ кыттыыны ыллылар. Бэстибээлгэ 3 нэһилиэктэн барыта 35 аҕам саастаах олоххо көхтөөх дьоммут кыттыыны ыллылар. Кэнсиэри культура дьиэлэрин уус-уран салайааччылара Түүлээхтэн Мария Винокурова, Тиит-Арыыттан Сардаана Турантаева, Бээрийэттэн Ольга Томская бииртэн биир дьоннорун сыанаҕа ыҥыран таһааран, кэнсиэр үрдүк таһымҥа ааһарыгар төһүү буоллулар. Бүгүҥҥү көрүүгэ лауреаттарынан буоллулар: Түүлээх нэһилиэгиттэн - Илья Румянцев, “Дэйбиирдээх үңкүүнү” толорбут үңкүү бөлөҕө; Бээрийэ нэһилиэгиттэн - “Доҕорбор” ырыаны толорбут трио; 2-с Байаҕантай нэһилиэгиттэн уус-уран ааҕыыга Анатолий Старостин-Сиэн Кынат “Санаайыктар, суруктар” айымньытыттан ааҕан Агафия Турантаева-Бысыина. Дипломаннарынан буоллулар: Түүлээх нэһилиэгиттэн - Зинаида Бочкарева (уус-уран ааҕыы), ансамбл; 2-с Байаҕантай нэһилиэгиттэн - Евдокия Саввина(соло), ансамбл; Бээрийэ нэһилиэгиттэн - Егор Васильев (соло), “Алгыс” үңкүү бөлөҕө, уус-уран ааҕыыга Анастасия, Илья Васильевтар, ансамбл. Уопсай көрүү түмүгүнэн: • 2-с Байаҕантай нэһилиэгэ - 4,55; • Бээрийэ нэһилиэгэ - 4,56; • Түүлээх нэһилиэгэ 4,58 баллары ыллылар. Бэстибээл саамай аҕам саастаах кыттааччытынан 85 саастаах, Саха АССР тыатын хаһаайыстыбатын үтүөлээх үлэһитэ Егор Ильич Васильев буолла. Кини бу көрүүгэ Виталий Андросов “Маңнайгы хаар” ырыатын толорон дипломант буолла. Кинини кытта төрөппүт уола, Бээрийэ нэһилиэгин баһылыгынан үлэлээбит Илья Егорович Васильев дьиэ кэргэнинээн кыттыыны ылбыттарын биһирии, кэрэхсии, астына көрдүбүт. Бу күн биир көлүөнэ дьон көрсөн итии чэйдээх остуол тула олорон сэлэһэн, эдэр саастарын санаан астына үңкүүлээн, Бээрийэ кулуубун үлэһиттэригэр истиң, сылаас көрсүһүүлэригэр махтанан тарҕастылар. Кэлэр көрүү алтынньы 23 күнүгэр Дүпсүн бөһүөлэгэр буолуоҕа. Манна 1-кы бөлөххө кыттар улахан нэһилиэктэр - Мүрү, Лөгөй, Найахы, Дүпсүн, 1-кы Хоро нэһилиэктэрэ кыттыыны ылыахтара. Анна Лугинова, улуустааҕы культура управлениетын кылаабынай специалиһа, дьүүллүүр сүбэ бэрэссэдээтэлэ. Алтынньы 21 күнэ, 2026 сыл.