“Кэхтибэт талааннар” бэстибээл Дүпсүңңэ
“Кэхтибэт талааннар” бэстибээл Дүпсүңңэ Мүрү, 1 Хоро, Лөгөй, Найахы нэһилиэктэрэ алтынньы 23 күнүгэр, бэтэрээннэр бэстибээллэригэр Дүпсүн сиригэр көрүстүлэр. Бэстибээл кыттыылаахтарын Николай Егорович Корнилов аатынан сынньалаң киинигэр киирээти кытта сахалыы таңастаах нэһилиэк ыччаттара арыылаах алаадьынан айах тутан, уруйдуу-айхаллыы көрүстүлэр. Улуустаа5ы бэтэрээннэр Сэбиэттэрин бэрэссэдээтэлэ Иван Колодезников Бэстибээл кыттыылаахтарыгар эҕэрдэтин тириэртэ, улуустааҕы бэтэрээннэр Сэбиэттэрин ыытар үлэлэрин туһунан билиһиннэрдэ, актыыбынай аҕа көлүөнэ дьоҥҥо махталын биллэрэн туран кыттыылаахтарга ситиһиини баҕарда. Тэрээһин кыттыылаахтара бу соторутаа5ыта 91 сааһыгар олохтон барбыт Дүпсүн нэһилиэгин ытыктанар кырдьаҕаһа, Саха АССР үтүөлээх зоотехнига, РСФСР т/х туйгуна, улуус уонна Дүпсүн нэһилиэгин Бочуоттаах олохтоо5о, уус-уран самодеятельность актыыбынай кыттыылаа5а Сивцева Татьяна Константиновна сырдык аатыгар тохтобул биллэрэн чуумпуран ыллыбыт. Э5эрдэ тылы Дүпсүн нэһилиэгин тыа сирин түөлбэтин дьаһалтатын специалиһа Майя Прибылых кэлбит нэһилиэктэргэ Дүпсүн нэһилиэгин баһылыгын аатыттан э5эрдэ суруктары, өйдөбүнньүк бэлэхтэри туттарда. Кэнсиэр Дүпсүн ыччаттарын э5эрдэ үңкүүтүнэн са5аланна. Бу аңардас э5эрдэ эрэ үңкүүтэ буолбатах, бу а5ам саастаах дьоммутугар ытыктабыл, сүгүрүйүү бэлиэтин курдук ылынан, бэстибээл кыттыылаахтара дохсун ытыс тыаһынан махталларын биллэрдилэр. Ыытааччылар Дүпсүнтэн Тамара Михайлова, Лөгөйтөн Марианна Фред, Мүрүттэн Мария Петухова, Найахыттан Светлана Петрова, Чараңтан Екатерина Свинобоева бэйэлэрин нэһилиэктэрин ылба5ай, истиң тылларынан хоһуйан, көрөөччүлэри э5эрдэлиир иһирэх тылларынан көрүү бэстибээлбит са5аланна. “Улахан иһит салааһыннаах” диэн өбүгэлэрбит хоһуйан этэн хаалларбыттарын курдук, улахан нэһилиэктэр үгүс талааннаах дьонноруттан талыллан кэлбит, бииртэн биир бастың нүөмэрдэр солбуйсан 3 чаастаах кэнсиэрбит биллибэккэ ааста. 5 нэһилиэктэн барыта 134 олоххо көхтөөх а5ам саастаах көлүөнэ дьон кыттыыны ыллылар. Түмүккэ бастыңнар ааттаннылар. Ол курдук лауреаттарынан буоллулар: • Дүпсүн далбар хотуттара, үңкүүһүттэр бөлөхтөрө; • Найахыттан Федор Петров, уус уран аа5ыыга “Кэрэхсээ” бөлөх, дьахталлар ансамбыла; • Лөгөйтөн Егор Лугинов, уус уран аа5ыыга Ульяна Бурнашева; • Мүрүттэн холбоһуктаах ансамбыл, “Чараңңа” ырыанан квартет; • 1 Хороттон “Алааһым арылы кустуга” ырыанан квартет. Дипломаннарынан буоллулар: • Мүрүттэн Василий Охлопков, “Үчүгэйиэн Мүрүбэр” үңкүүнэн “Күндүүнэ” бөлөх; • 1 Хороттон Николай Бурцев, “Охсуллубут от” кинигэттэн уус-уран аа5ыы; • Дүпсүнтэн Светлана Алексеева; • Лөгөйтөн “Сомо5олоһуу” үңкүү, “Айылгы” вокальнай ансамбл; • Найахыттан “Күбэйэ” үңкүү бөлө5ө, “Уочаракка” сыанка. Толоруу маастарыстыбата, маассабас, көстүүм сыаналанан • Дүпсүн - 4,81 • 1 Хоро - 4,82 • Мүрү - 4,87 • Лөгөй - 4,90 • Найахы - 4,91 Бааллары ыллылар. Түгэнинэн туһанан бу ый 19 күнүгэр 75 сааһын туолбут, уус-уран самодеятельность актыыбынай кыттыылаа5а, сыана бэтэрээнэ, кэхтибэт талаан Федор Дмитриевич Петровка улуус култуура5а управлениетын, улуус мелодистарын түмсүүтүн аатыттан э5эрдэ сурукпутун туттардыбыт. Дүпсүн сирин дьоно сүрдээгин тэринэн ыалдьыттарын көрүстүлэр, бары усулуобуйаны барытын тэрийбиттэр. Бүтэһигэр нэһилиэк тэрилтэлэрэ бары кыттыһан тэрийбит фуршет маанылаах остуолугар бэстибээл бары кыттыылаахтарын ыңыран күндүлээтилэр. Ырыа-тойук да ылланна, үңкүү-битии да тэрилиннэ. Бэстибээл тэрийээччилэрин ааттарыттан маннык истиңник көрсүбүт Дүпсүн дьонугар, култуура дьиэтин бары үлэһиттэригэр махталбытын тиэрдэбит. Бастакы бөлө5ү түмүктүүр көрүү алтынньы ый 28 күнүгэр Тумул бөһүөлэгэр буолуо5а. Манна Курбуһах, Өлтөх, Суотту, Боро5он нэһилиэктэрин а5ам саастаахтара түмсэн күөн-көрсүөхтэрэ. Быйыл улууспутугар биллэриллибит Түмсүү уонна бииргэ үлэлээһин сылыгар маннык тэрээһиннэр тэриллэннэр дьоммут-сэргэбит биир өйгө-санаа5а түмсэн иннибит диэки эрэллээхтик хардыылыа5ың, айыа5ың-тутуо5уң!!!