Баһаартан сэрэхтээх буолуу - барыбыт уопсай соруга — 3 июля 2026 г. в 06:42:20.165
Баһаартан сэрэхтээх буолуу - барыбыт уопсай соруга Соторутааҕыта күүстээх тыаллаах, этиҥнээх ардахтар кэннилэриттэн улууспутугар айылҕаҕа уонна дьон олоҕор кутталы үөскэтэр баһаардар күөдьүйэн тахсыбыттара. Бэлиэтээһиннэртэн көстөрүнэн, баһаар сезона саҕаланыаҕыттан уопсайа 66 гектар иэннээх сири хаппыт 13 тыа баһаара бэлиэтэммит. Хомойуох иһин, баһаар үксэ дьон сэрэҕэ суох буолуутуттан, баһаартан сэрэхтээх буолуу быраабылаларын кэһииттэн тахсыбыта билиннэ. Улуус дьаһалтата балаһыанньаны хонтуруолга ылан, бэс ыйын 23 күнүттэн ураты баһаартан сэрэхтээх буолуу («Особый противопожарный режим») эрэсиимин киллэрбитэ. Баһаартан сэрэхтээх буолуу сүрүн быраабылалара: - Ураты дьаһал тахсыар диэри тыаҕа тахсыы бобуллар. Бу кэмҥэ ойуурга рейдэлэр оҥоһуллуохтара. - Кураанах от-мас, лабаа, мутук умайыыта түргэнник тарҕанарынан, сир кураанах кэмигэр аһаҕас уоту оттор бобуллар. - Табаҕы, испиискэни умулларбакка быраҕымаҥ, уоту күөдьүтүөн сөптөөх малы-салы тыаҕа хаалларымаҥ. - Баһаар тахсыбытын көрдөххүтүнэ тутатына 112 нүөмэргэ эрийэн биллэриҥ. Биир сэрэҕэ суох быһыы иэдээннээх содулга тиэрдиэн сөбүн умнумаҥ. Айылҕабытын, дьоммутун-сэргэбитин харыстыыр туһугар бары биир санаанан, эппиэтинэстээхтик сыһыаннаһыаҕыҥ. Кураанах этиҥ эрэ буолбакка, киһи дьалаҕайыттан тахсар алдьархайы тохтотор кыахтаахпыт. Бэйэ-бэйэбитигэр сэрэтии оҥорсон, куттал суох буолуутун хааччыйыаҕыҥ. Улуустааҕы ыксаллаах быһыы-майгы хамыыһыйата.