Нэһилиэк баһылыктарын мунньаҕар оттукка бэлэмнэнии боппуруоһа турда — 4 сентября 2026 г. в 02:15:05.052
Нэһилиэк баһылыктарын мунньаҕар оттукка бэлэмнэнии боппуруоһа турда Балаҕан ыйын 3 күнүгэр, Уус Алдан улууһун дьаһалтатыгар нэһилиэк баһылыктара кыттыылаах сүбэ мунньах буолан ааста. Сүрүн бэбиэскэнэн оттукка бэлэмнэнии боппуруоһа турда. Балаҕан ыйын 7 күнүгэр ититии ыытыллыахтаах, баһылыктар эбийиэктэр бары ититиигэ бэлэм олороллорун ыйдылар, ол эрээри быстах өрөмүөннэр, тупсарыы үлэтэ өссө да бара туралларын эттилэр. Хас биирдии эбийиэккэ бэлэм буолуу пааспара ирдэнэр, ол докумуону толоруу туһунан “Биир кэлим заказчик сулууспата” МБТ инженерэ Иван Портнягин иһитиннэрии оҥордо. Үгүс нэһилиэктэр ититии ситимин сууйтарыытын (промывка) оҥорторбокко сылдьаллара билиннэ. Оттуур хампаанньа хаамыытын туһунан тыа хаһаайыстыбатын управлениетын начальнига Артем Сивцев билиһиннэрдэ. Ол курдук, былааннаммыт 31 000 туонна оттон 28 000 туонната бэлэмнэммит, былаан 85 % куоһарыллыбыт, ону кытары 1500 туонна курулаабыт от баарын аахтахха, улууска кыстыгы туоруур от баар буолбут. Билигин даҕаны биирдиилээн отчуттар уонна мобильнай биригээдэлэр оттуу сылдьаллар эбит, онно эбии “көҥүл хотуур” биллэриллэн, тустаах дьоҥҥо оттоммотох сирдэри ыйан-көрдөрөн биэрбиттэр. Үүт былаанын толорууга билиҥҥи туругунан, 2000 туонна үүт туттарыллыбыт, өссө 1000 туонна үүтү быйыл тутар соруктаахтар. Улуус баһылыгын солбуйааччы Алексей Тарасов олохтоох көҕүлээһини өйүүр бырагыраама (ППМИ) үлэтин хаамыытын сырдатта. Нэһилиэктэр бары кэриэтэ докумуон толоруутугар бэлэмнэр, аҕыйах нэһилиэккэ үп-харчы өттүгэр ыктарыы баарын бэлиэтээтэ. ППМИ бырагыраамата ситиһиилээхтик үлэлээбитэ 10-с сыла буолар, онно анаммыт балаҕан ыйын 10 күнүгэр буолуохтаах тэрээһиҥҥэ Уус Алдантан 10 киһилээх делегация кыттыыны ылыахтааҕын эттэ. Делегацияҕа нэһилиэк баһылыктара, спонсордар, сүрүннүүр актыбыыстар сүүмэрдэниэхтэрэ. ✍️ Анатолий Кириллин 📲Мах-каналбытыгар сурут ⬇️ https://max.ru/channel_ua_murusahargata 🌐 https://мюрюгазета.рф/ ✅ @uamurusahargata @ulusmedia